Երեկ հայտնի դարձավ, որ անցած տարի դեկտեմբերին Գյումրու Սլաբոդկա թաղամասում 57-ամյա Ջուլիետա Ղուկասյանի դաժան սպանության գործով հայտարարվել է նախաքննության ավարտ: Գործը դատախազության կողմից հաստատվելուց հետո շուտով կուղարկվի Շիրակի մարզի ընդհանուր իրավասության դատարան:
Կնոջ սպանության մեջ մեղադրվում է Գյումրիում տեղակայված 102-րդ ռազմաբազայի պայմանագրային զինծառայող Անդրեյ Ռազգիլդեևը: Ռուս զինծառայողն ինչպես նախաքննության ամբողջ ընթացքում, այնպես էլ ներկայում շարունակում է մնալ ռազմաբազայի տարածքում: Անգամ տուժողի իրավահաջորդների ներկայացրած բազմաթիվ միջնորդություններից հետո Ռազգիլդեևը նույնիսկ մեկ օր չանցկացրեց ՀՀ քրեակատարողական հիմնարկներից որևէ մեկում:
Մինչդեռ տուժողի իրավահաջորդի ներկայացուցիչ Արթուր Սաքունցը նույն միջնորդության մեջ հիմնավորում էր, թե ինչու պետք է հանցագործություն կատարած ռուս զինծառայողը գտնվի ՀՀ ՔԿՀ-ներում: Մասնավորապես, համաձայնագրում հստակ նշված է, որ ռուսական ռազմական բազայի կազմի մեջ մտնող անձանց կատարած հանցագործությունների դեպքում գործում է ՀՀ օրենսդրությունը, այսինքն՝ պետք է առաջնորդվել ՀՀ քրեական դատավարության օրենսգրքով և «Ձերբակալված և կալանավորված անձանց պահելու մասին» ՀՀ օրենքով, այն է՝ ռուս զինծառայողը պետք է պահվեր Հայաստանի Հանրապետության պետական կառավարման լիազորված մարմինների կառուցվածքներում գործող ձերբակալվածներին կամ կալանավորվածներին պահելու վայրերում: Մինչդեռ ռուսական 102-րդ ռազմաբազան այդպիսի վայր չէ: Կատարված հանցագործությունն էլ չի դասվում ՌԴ և ՀՀ միջև կնքված համաձայնագրի այն բացառությունների շարքին, որոնց դեպքում գործում է ՌԴ օրենսդրությունը: Ներկայացված միջնորդությունը, սակայն, հետագայում մերժվեց: Մերժվեցին նաև դրա վերաբերյալ ներկայացված բողոքները: Եվ սա այն դեպքում, երբ տուժողի իրավահաջորդի ներկայացուցչի խոսքով՝ ռուս զինծառայողին ՀՀ համապատասխան քրեակատարողական հիմնարկ տեղափոխելու դեպքում միայն հնարավոր կլինի պնդել ՀՀ քրեական դատավարության օրենսգրքի 17-րդ հոդվածով սահմանված լրիվ, օբյեկտիվ և բազմակողմանի քննության մասին։
Թե ինչ կարգով տեղի կունենա արդեն դատավարությունը՝ այս պահին դժվար է ասել: Ռուս զինծառայողին կա՛մ պետք է բերեն Շիրակի մարզի ընդհանուր իրավասության դատարան, կա՛մ դատավորը, Պերմյակովի դատավարության օրինակով, գնա ու ռուսական ռազմաբազայի տարածքում դատաքննություն իրականացնի: Սակայն հաշվի առնելով, որ ի սկզբանե անտեսվել է ՀՀ օրենսդրությունը, ռուս զինծառայողը չի տեղափոխվել ՀՀ քրեակատարողական հիմնարկ՝ ենթադրվում է, որ դատավարությունն էլ է ընթանալու նույն սցենարով՝ դատավորը գնալու է և ռազմաբազայի տարածքում դատավարություն իրականացնի:
Ինչ վերաբերում է գործի նախաքննության ավարտին, ապա տուժողի իրավահաջորդի ներկայացուցիչ՝ իրավապաշտպան, Հայաստանի Հելսինկյան ասոցիացիայի Վանաձորի գրասենյակի ղեկավար Արթուր Սաքունցն արդեն իսկ հայտարարել է, որ հանցագործության շարժառիթը այդպես էլ բացահայտված չէ, և գործը գնում է դատարան հենց այս տեսքով:
Իրավապաշտպանը նաև հայտնել է, որ անընդունելի կհամարեն, եթե գործը քննվի ռազմաբազայի տարածքում, և իրենք անպայման կբողոքարկեն այդ փաստը:
Հիշեցնենք, որ Ջուլիետա Ղուկասյանը սպանվել էր դեկտեմբերի 2-ի լուսաբացին՝ աշխատանքի գնալու ժամանակ։ Կինն աշխատում էր Գյումրու քաղաքապետարանի Բնակկոմունալ և շրջակա միջավայրի պահպանության բաժնում որպես հավաքարար և վաղ լուսաբացին ավլում էր փողոցները։
Նախնական տեղեկություններով՝ գյումրեցի կնոջ վրա հարձակվել էր ՌԴ 102-րդ ռազմաբազայի զինվորականն ու գինու շշով ծեծել և անճանաչելի էր դարձրել կնոջը։ Ռուս զինծառայողին մեղադրանք էր առաջադրվել ոչ թե ՀՀ քրեական օրենսգրքի 104-րդ հոդվածի 1-ին կամ 2-րդ մասերով (սպանություն), այլ մեղադրանք է առաջադրվել ՀՀ քրեական օրենսգրքի 112-րդ հոդվածով (դիտավորությամբ առողջությանը ծանր վնաս հասցնելը, որն անզգուշությամբ առաջացրել է մահ)։