Թուրքական Սիդե և Ալանիա հանգստավայրերի առևտրականներն ու արհեստավորները զբոսաշրջության և մշակույթի նախարարությունից խնդրել են վերանայել հյուրանոցներում գործող «ամեն ինչ ներառված է» համակարգի ստանդարտները, հայտնում է Ռուսաստանի տուրօպերատորների ասոցիացիան:
Նշվում է, որ Մանագավթի առևտրաարդյունաբերական պալատից գերատեսչություն նամակ է ուղարկվել՝ «ամեն ինչ ներառված է» համակարգը փոփոխելու խնդրանքով և որոշելու այն շրջանները, որտեղ այս տիպի հյուրանոցները չեն վնասի այլ բիզնեսներին:
Պալատի անդամները հայտարարել են, որ «ամեն ինչ ներառված է» համակարգը բացասաբար է անդրադառնում իրենց բիզնեսի վրա, քանի որ զբոսաշրջիկները դուրս չեն գալիս հյուրանոցներից և գումար չեն ծախսում տեղի ռեստորաններում, խանութներում, ինչպես նաև չեն շրջագայում երկրում:
Բացի այդ, առևտրաարդյունաբերական պալատում կարծում են, որ որ «ամեն ինչ ներառված է» համակարգի ստանդարտների վերանայումը թույլ կտա վաճառողներին և հյուրանոցներին արդար մրցակցել՝ հաճախորդների փողերով:
Նամակում նշվում է, որ Թուրքիան որակյալ զբոսաշրջիկի կուրս է վերցրել, որն ի վիճակի է մեկ այցի ընթացքում առնվազն հազար դոլար ծախսել:
