Ռոբերտ Քոչարյանն ու Սերժ Սարգսյանը միայնակ բռնապետություն չեն ստեղծել, նրանց այս գործում օժանդակել են բազմաթիվ մարդիկ՝ դրա դիմաց ստանալով արտոնություններ, թալանի ինդուլգենցիա։ Այդ «կարկառունների» շարքում նշանային դեմք է Իշխան Զաքարյանը, որը նաև քաղաքական «քամելեոնի» հատկություն ունի ու, թերևս, կփորձի «լեզու գտնել» նաև նորերի հետ, եթե Հայաստանում ու Սփյուռքում նրա դեմ մեծ շարժում չծավալվի։ Այս խորագրով «Առաջին լրատվական»-ը հունիս ամսին ակցիա իրականացրեց Համահայկական խաղերի կազմակերպիչ Իշխան Զաքարյանի դեմ՝ ընդվզելով այն փաստի դեմ, որ Ռոբերտ Քոչարյանի ու Սերժ Սարգսյանի կոռումպացված ռեժիմների «աչքի լույս» այս պաշտոնյան ընդունելության արժանացավ հեղափոխական կառավարության առաջին դեմքերի մոտ՝ փաստորեն կարողանալով «լեզու գտնել» նաև նորերի հետ։
Մեր բողոքի ձայնը մնաց անլսելի՝ չնայած այն հանգամանքին, որ մի քանի հրապարակումներով ներկայացրինք Իշխան Զաքարյանի կոռուպցիոն անցյալը, բացահայտեցինք, որ նա Ռոբերտ Քոչարյանի «աչքն ու ականջն» է հեղափոխական Հայաստանում՝ հանդիսանալով հակահեղափոխական «պուտչի» հիմնական կազմակերպիչներից մեկն անցած տարվա հոկտեմբերի 2-ին, երբ նախորդ խորհրդարանն ակնհայտ մարտահրավեր նետեց հեղափոխությանը։
Բնական է, երբ մեր հորդորները մնում են անպատասխան, Իշխան Զաքարյանն ավելի սանձարձակ ու «համարձակ» է դառնում, եթե նույնիսկ նրա անմիջական «ջանքերով», կազմակերպչական հարթության վրա, ըստ էության՝ տապալվել են Համահայկական խաղերը։
Անդրադառնալով հարցին, թե ինչպես եղավ, որ կրկին վերընտրվեց Համահայկական խաղերի համաշխարհային կոմիտեի նախագահ և ներկայիս իշխանությունների հետ ինչպե՞ս է աշխատում, Իշխան Զաքարյանը պատասխանել է, որ իշխանությունների հետ շատ լավ համագործակցում ու աշխատում է։ Զաքարյանի նման պատասխանն իսկապես ապտակ է մեր տասնյակ հազարավոր քաղաքացիներին, որոնք անցած տարի հեղափոխություն են իրականացրել ու՝ մերժելով Ռոբերտ Քոչարյանին ու Սերժ Սարգսյանին, ակնկալել են, որ պետական համակարգը կմաքրվի նրանց հարյուրավոր, հազարավոր «նվիրյալներից», որոնցից շատերը պետք է պատասխան տան իրենց արարքների, կատարած հանցագործությունների համար։
Նրանց շարքում առաջիններից մեկը պետք է լիներ Իշխան Զաքարյանը, որի միայն դղյակ-առանձնատան պատմությունը կոռուպցիայի ցցուն օրինակ է։ Սակայն, ըստ ամենայնի, Իշխան Զաքարյանը կարողանում է «լեզու գտնել» ամենքի, նույնիսկ՝ հեղափոխության թիմի հետ։
Քրեաօլիգարխիայի հայտնի «կասիրը» մեղք չունի, որովհետև նրա մարդկային տեսակն է այդպիսին․ շողոքորթելով, քծնելով՝ նա կարողանում է սիրաշահել շատերին, միայն թե թալանածը վայելելու հնարավորություն ունենա։ Մենք պետք է մեղադրենք հեղափոխության թիմին, որը մեր աչքի առաջ փոխվում է, երբեմն դառնում անճանաչելի, շատ հաճախ օգտվում է նախկինների ծառայություններից՝ լեգիտիմացնելով նրանց հանցագործությունները ու փաստորեն՝ ուրանալով հեղափոխության իդեալներին։ Հակառակ պարագայում ինչպե՞ս բացատրել այն հանգամանքը, որ ճաղերի հետևում չեն Սերժ Սարգսյանը, Գագիկ Խաչատրյանը, Աղվան Հովսեփյանը կամ՝ ի՞նչ տրամաբանությամբ է ՊԵԿ նախագահի պատասխանատու պաշտոնը զբաղեցնում Դավիթ Անանյանը, ինչո՞ւ է Իշխան Զաքարյանն արժանանում փոխվարչապետի ընդունելությանը կամ «դուխով» զարդարում հեղափոխության առաջնորդի թիկունքը Համահայկական խաղերի բացման միջոցառման ժամանակ։
Սրանք ամենևին էլ հռետորական հարցեր չեն, ամեն ինչ շատ ավելի կոնկրետ է, սակայն մենք այդպես էլ չենք լսում իշխանության առաջին դեմքերի հոդաբաշխ բացատրություններն այս և այլ հարցերի վերաբերյալ։ Օրինակ՝ այսօր էլ պարզ դարձավ, որ Վարդավառի տոնի անճաշակ միջոցառումը կազմակերպելու համար ԱԺ-ն ծախսել է հինգ միլիոն դրամ ու ակամայից մարդիկ հիշում են, թե նախկին համակարգն ինչպես էր նման ձևերով «փողեր լվանում»։
Եթե Զաքարյանը նոր իշխանության հետ «լավ համագործակցում» է, ապա հարկ է հիշեցնել անցյալում նրա «փայլուն» համագործակցության մի քանի դեպքեր։
Երբ մեկնարկեց 88-ի շարժումը, Իշխանը կոմսոմոլի աշխատող էր, սակայն շատ շուտով սկսեց «լավ համագործակցել» ՀՀՇ-ի հետ, ինչի հետևանքով 1995-ին նույնիսկ պատգամավոր դարձավ՝ օրվա իշխանության հովանավորությամբ։ Զաքարյանը Տեր-Պետրոսյանի թիմից առաջին ճողոպրողներից մեկն էր ու 1998-ի պալատական հեղաշրջման օրերին իր գործընկեր պատգամավորների էր «հավաքագրում» Սամվել Բաբայանի հրահանգով։
2008-12թթ-ի Իշխան Զաքարյանը «լավ համագործակցել» է նաև Տիգրան Սարգսյանի հետ՝ Վերահսկիչ պալատի նախագահի պաշտոնում դառնալով վարչապետի դեմ կազմակերպված օլիգարխիկ «պուտչի» ակտիվ մասնակիցը, ինչի հետևանքով կառավարության ղեկավար դարձավ Հովիկ Աբրահամյանը։
Տարիներ շարունակ Իշխան Զաքարյանը «լավ համագործակցել» է նաև Գագիկ Ծառուկյանի հետ՝ մինչև որ 2017-ին նրա դեմ կազմակերպեց «ցուցակային» հայտնի «խռովությունը»։
Իրականում Իշխան Զաքարյանը լավ համագործակցել է Ռոբերտ Քոչարյան-Սերժ Սարգսյան զույգի հետ՝ սպասարկելով նրանց շահերը ու դրա դիմաց ստանալով թալանի «ինդուլգենիցա»։ Ահա, այսպիսի մարդու առաջ են դուռ բացում հեղափոխական իշխանությունները՝ մինչև կճաշակեն նրա հետ «լավ համագործակցության» դառը պտուղները։
