Շվեդ էկո-ակտիվիստ Գրետա Թունբերգը մեկնել է օվկիանոսից այն կողմ՝ ՄԱԿ-ի կլիմայի խորհրդաժողովին մասնակցելու համար: Այն տեղի կունենա Նյու Յորքում, սեպտեմբերին: 16-ամյա աշակերտուհին Մեծ Բրիտանիայից Միացյալ Նահանգներ է ուղևորվել բարձր տեխնոլոգիական, ածխածնի զրոյական արտանետմամբ, մրցավազքային զբոսանավով: Ուղևորությունը կտևի մոտ երկու շաբաթ:
«Նրանց համար, ովքեր գտնվում են նավի վրա, հեշտ չի լինի, բայց դա, հավանաբար, սպասելի էր»,- ասել է Գրետան՝ մեկնաբանելով նավի սպարտայական պայմանները: Ակտիվիստը խոսել է նաև նրանց մասին, ովքեր կլիմայի փոփոխությունը խնդիր չեն համարում. «Միշտ գտնվում են մարդիկ, որոնք չեն ուզում հասկանալ, կամ պարզապես հաշվի չեն առնում գիտական համայնքի կարծիքը: Ես անտեսելու եմ այդպիսի մարդկանց: Ես զբաղվում եմ նրանով, որ շփվում եմ գիտնականների հետ: Եվ եթե ինձ չեն լսում, ի՞նչ կարող եմ անել»:
Ավելի վաղ շվեդուհին ասել էր, որ ցանկանում է մասնակցել Նյու Յորքի գագաթնաժողովին, բայց, սկզբունքորեն հրաժարվել է թռչել, քանի որ ինքնաթիռները մթնոլորտ են արտանետում ածխաթթու գազ, ջրային գոլորշի, ազոտի օքսիդներ և մուր: Այլընտրանքային տարբերակ է դարձել զբոսանավը, որը հագեցած է արևային մարտկոցներով և էլեկտրաէներգիա արտադրելու համար ստորջրյա տուրբիններով:
