2020 թվականին Արցախում տեղի ունենալիք նախագահական ընտրություններին մասնակցությունը չի բացառում Արցախի արտաքին գործերի նախարար Մասիս Մայիլյանը։ Նման հեռանկարը ողջունել են Հայաստանի մի շարք վերլուծաբաններ, քաղաքագետներ և հայտնել իրենց աջակցությունը։
Քաղաքագետ Արմեն Հովհաննիսյանը «Առաջին լրատվական»-ի հետ զրույցում նշեց, որ ինչ-որ առումով Մասիս Մայիլյանը կարող է արդեն իսկ առաջադրվելու պատրաստակամություն հայտնած ուժերին այլընտրանք լինել: «Մասիս Մայիլյանը աչքի ընկնող ռազմաքաղաքական էլիտայի մաս չի կազմում, նա ավելի քաղաքացիական, ավելի հանրային ու ոչ սկանդալային անձնավորություն է։ Այդ առումով՝ այո, կարող է լինել այլընտրանք։ Բայց մյուս կողմից՝ քանի որ նրա անունը շատ սերտորեն կապված է Արցախի անկախության ճանաչման գաղափարի հետ, ապա ես այդպիսի խորքային այլընտրանք համարել չեմ կարող»,- ասաց նա։
Հովհաննիսյանի դիտարկմամբ՝ Մասիս Մայիլյանը համարվում է անկախության ջատագով, ճիգեր է գործադրել անկախության ճանաչման համար: «Ես խորքային այլընտրանք կհամարեմ նրան, ով կխոսի միացման անհրաժեշտության մասին, միասնական Հայաստանի Հանրապետության մասին։
Նորից եմ ասում՝ անձը համակրելի է, հայտնի, հարգված անձնավարություն է, բայց նրա աշխարհայացքը խորքային առումով այլընտրանքային չէ»,- նշեց քաղաքագետը։
Մեր զրուցակիցը ղարաբաղյան հակամարտության վերաբերյալ տեսլականն առաջնային է համարում նախընտրական շրջանում. «Առաջին անգամ այլ որակի ընտրություններ են լինելու Արցախում, ամենակարևորը Արցախի կարգավիճակն ու անվտանգության հարցերն են, արցախցիների համար շռայլություն կլինի այլ փաստերն այլ փուլում առաջնային համարել»։
Ըստ Հովհաննիսյանի՝ այժմ Արցախի ընտրություններին մասնակցության պատրաստակամություն դրսևորած գործիչները ոչ միայն անջատողականներ են, այլև, ի տարբերություն Մասիս Մայիլյանի, չունեն պարկեշտ կենսագրություն: «Այդ առումով գոնե պարոն Մայիլյանը պարկեշտ մարդ է»,- եզրափակեց նա։