Երևանի ընդհանուր իրավասության դատարանում այսօր հետաձգվեց ԼՂՀ ՊԲ նախկին հրամանատար Սամվել Բաբայանի գործով դատական նիստը: Մի կողմից դատական գործընթաց, մյուս կողմից՝ մասնակցություն դատական գործընթացներին. որքանո՞վ են համատեղելի: «Առաջին լրատվական»-ի հետ զրույցում անդրադառնալով այս հարցին՝ Սամվել Բաբայանն ընդգծեց, որ դատական գործընթացը չի խանգարում քաղաքական գործունեությանը. «Ես գնում եմ արդարացման ճանապարհով, ցանկանում եմ ապացուցել իմ անմեղությունը, ես այդ մեղադրանքի հետ կապ չունեմ: Դատարանը կա՛մ պետք է ապացուցի իմ մեղքը, կա՛մ հերքի»:
«Ընտրություններին մասնակցելու իմ առաջին նպատակն է ստուգել, թե ժողովուրդն ինձ որքանով կընդունի, կցանկանա՞՝ ես վերադառնամ քաղաքականություն, թե՞ ոչ»,- նշեց Ս. Բաբայանը: Նա նաև հավելեց, որ իր քաղաքական հակառակորդների մի մասը նոր է, մյուս մասը՝ հին, և հավելեց, որ Բակո Սահակյանին իր քաղաքական հակառակորդը չի համարում:
Սամվել Բաբայանը նշեց, որ հանդիպել է ոչ միայն Արայիկ Հարությունյանի, այլ նաև արցախյան այլ քաղաքական ուժերի հետ. «Արայիկ Հարությունյանի ղեկավարած քաղաքական ուժն այսօր մեծամասնություն է Արցախի ԱԺ-ում, ես պետք է իմանամ, թե այդ քաղաքական ուժն ինչ դիրքորոշում ունի կապված՝ իմ նախաձեռնած ստորագրահավաքի հետ: Մեր հանդիպումը գաղտնի չի եղել, հինգ անգամ հանդիպել ենք»:
Սամվել Բաբայանը հավաստիացրեց, որ իր քաղաքական գործունեությունը որևէ մեկի հետ չի համաձայնեցնում: «Ես իմ գործողությունները համաձայնեցնում եմ միայն ժողովրդի հետ… Նախագահ դառնալը ինքնանպատակ չէ, Արցախում հարցեր կան, պետք է լուծվեն… Ես ոչ մեկի հետ որևիցե հաշիվ մաքրելու մտադրություն չունեմ: Ընտրություններից պետք է դուրս գանք համախմբված, բռունցք դարձած, իմ նպատակը դա է»,- նշեց Ս. Բաբայանը և ընդգծեց. «Եթե ՀՀ իշխանությունները կատեգորիկ չուզեն ինձ տեսնել՝ կհեռանամ»:
Անդրադառնալով դիտարկմանը, որ իրեն վերագրվում է ռուսական միջամտության ազդեցությունը՝ Ս. Բաբայանը հերքեց. «Ես ինչքան տեղյակ եմ, Ղարաբաղի այսօրվա իշխանությունը Մոսկվայում «դաբրո» է փնտրում: Ես երբեք արտասահմանյան որևիցե իշխանության հետ կապ չեմ ունեցել, որևէ մեկի «կալպակի» տակ չեմ հայտնվել»:
Մանրամասն՝ տեսանյութում:
