Արդարադատության նախարարն օրեր առաջ ազդարարեց Սահմանադրության փոփոխության գործընթացի մասին, որի առիթով աշխատանքային խումբ է ստեղծվելու 2020թ. փետրվարին: Այդ փոփոխության նշանակությունը չունի ավելորդ գնահատման անհրաժեշտություն, միաժամանակ կարևոր է, թե ինչպիսին է լինելու փոփոխության բովանդակությունն ու ինչի շուրջ է հանրությունը գալու համաձայնության: Այդ իմաստով, թերևս, հետաքրքիր հարցերից մեկն այն է, թե արդյոք Հայաստանում կա խորհրդարանական կառավարման մոդելից նախագահականի կամ կիսանախագահականի հետանցման անհրաժեշտություն:
Հարկ է հիշեցնել, որ երբ տեղի էր ունենում խորհրդարանի կառավարման մոդելի ընտրությունը, հակափաստարկների շարքում գերիշխում էին եկուսը՝ պատերազմող երկրի հանգամանքը և գերագույն գլխավոր հրամանատարի պարագան, որի արդյուքնում անարդյունավետ էր համարվում նախագահական կամ կիսանախագահական ձևը և քաղաքական համակարգի չկայացվածությունը:
Թեմայի շուրջ «Առաջին լրատվական»-ի հետ քնարկմանը մասնակցեցին քաղաքագետ Ստեփան Սաֆարյանը, վերլուծաբան Աղասի Մարգարյանը և «Քաղաքացու որոշում» կուսակցության գործադիր խորհրդի անդամ Հայկ Սահակյանը:
Ստեփան Սաֆարյանի դիտարկմամբ՝ շատ լավ է, որ քաղաքական նոր օրակարգ է ձևավորվում. սահմանադրական փոփոխությունների բոլորն էին սպասում: «Սահմանադրության մեջ հաշվի չէին առնված այնպիսի զարգացումներ, որոնք տեղի ունեցան Հայաստանում: Դատական իշխանության ձևավորման և նրա անկախության ապահովման համար ՀՀ Սահմանադրությունը պետք է փոփոխության ենթարկվի: Նախկին իշխանությունները հրաշալի իմացել են, թե ինչու են խեղդում իշխանության այդ կարևորագույն ճյուղը»,- նշեց քաղաքագետը:
Հայկ Սահակյանի դիտարկմամբ՝ սահմանադրական փոփոխությունները հեղափոխության օրակարգի մի մասն են կազմում. «Պետք է սահմանադրական փոփոխություններն ի կատար ածվեն, նախ՝ որպեսզի հեղափոխությունն ամբողջանա, և երկրորդ՝ որպես պետություն, որպես քաղաքացի մենք կարիք ունենք լեգիտիմ Սահմանադրություն ունենալու. դա կենսական անհրաժեշտություն է»: Հայկ Սահակյանը նաև կարևորեց Սահմանադրության մեջ ժողովրդավարության տարրերի ընդգրկումը:
«Ունենք հապճեպ, հապշտապ գրված Սահմանադրություն, անհրաժեշտություն կա Սահմանադրության բովանդակությունը փոփոխել»,- նշեց Աղասի Մարգարյանը՝ հավելելով,որ Սահմանադրությունը պետք է համապատասխանի Հայաստանի ներքաղաքական կյանքի զարկերակին:
Մանրամասն տեսանյութում: