Վարչապետ Նիկոլ Փաշինյանի՝ գաղտնի զեկույցի մասին բարձրաձայնելուց հետո չի դադարում հանրային դիսկուրսը, թե Հայաստանում ինստիտուտներ եղե՞լ են, թե՞ չեն եղել: Ըստ Փաշինյանի՝ նախկին կառավարման համակարգը հիմնված է եղել կոռուպցիայի վրա, և եթե կոռուպցիան հանում ես, տակը ոչինչ չի մնում: Ինստիտուտներ եղե՞լ են, թե՞ չեն եղել, ի վերջո:
«Առաջին լրատվական»-ի այս հարցին ի պատասխան՝ քաղտեխնոլոգ Կարեն Քոչարյանը մասնավորապես ասաց. «Ես կարծում եմ, որ կաշառակերությունը եղել է ամենուրեք, բայց դա չի նշանակում, որ կաշառակերություն չի եղել: Որովհետև դա միայն Հայաստանում չէ այդպես, աշխարհում շատ երկրներում գործում են և՛ ինստիտուտներ, և՛, զուգահեռ, կաշառակերությունը: Մեկը մյուսի հետ կապել, որ եթե մեկը կա, մյուսը լինել չի կարող, չեմ կարծում, թե ճիշտ է: Դա կարող է փտել, բայց դա ինստիտուտ է»:
Այդ «ինստիտուտը» ինստիտո՞ւտ է, թե՞ մետաստազներով ինչ-որ ձևագոյացություն, որը վնասում է երկրի կայացմանը: Վանաձորի Հելսինկյան քաղաքացիական ասամբլեայի ղեկավար Արթուր Սաքունցը այս կապակցությամբ կարծիք հայտնեց, թե արդյոք պե՞տք էր ինչ-որ գաղտնի զեկույց կարդալ, որ դա իմացվեր: Բայց եթե կա այդպիսի զեկույց, ըստ իրավապաշտպանի, ինքնին հետաքրքիր է և դա պետք է հասանելի լինի հանրությանը: «Պետական ինստիտուտներ եղել են, ինչպե՞ս կարող էին չլինել: Բանակ եղել է, Ազգային անվտանգության ծառայություն կար ու կա, դատարաններ կային ու կան, Ազգային ժողով կար ու կա, այսինքն՝ Հայաստանի Հանրապետությունը կա՛: Իմ համոզմամբ՝ այդ փաստաթուղթը այն թուղթն է, որին ծանոթ են եղել նախորդ իշխանությունները, և այդ փաստաթուղթը կարող է հիմնավորել պետության զավթումը»,- նշեց նա:
Մանրամասները՝ տեսանյութում։