Օգոստոսի 12-ին Անվտանգության խորհրդի քարտուղար Արմեն Գրիգորյանի հրավերով Երևան է ժամանում ՌԴ անվտանգության խորհրդի քարտուղար Նիկոլայ Պատրուշևը:
Պատրուշևն, իհարկե, առաջին անգամ չէ գալիս Հայաստան, բայց այցն առավել հետաքրքիր է դառնում օգոստոսի 5-ին Ստեփանակերտում Նիկոլ Փաշինյանի հնչեցրած ելույթի ֆոնին, թեև չկա հստակ ինֆորմացիա՝ այցը պլանավորված էր ավելի վա՞ղ և տեղի էր ունենալու ելույթից անկա՞խ, թե՞ իրականացվում է հենց ելույթի հետքով։
Քաղաքագետ Արկադի Վարդանյանը չի կարծում, թե Պատրուշևը Հայաստան է այցելում Նիկոլ Փաշինյանի ելույթի հետքերով։ Ըստ նրա՝ ՌԴ Անվտանգության խորհրդի քարտուղարը Հայաստան է գալիս Պուտինի այցին ընդառաջ տրամադրություններ շոշափելու համար. «Ավելի ճիշտ կլինի ասել, որ Պատրուշևը գալիս է, որպեսզի տեսնի մեր հասարակության տրամադրվածությունը, քանի որ հիմիկվանից նախապատրաստվում է Պուտինի այցը, եթե իհարկե այդ այցը կայանա։Ես կասկածներ ունեմ, որովհետև այն վիճակում, որում այսօր գտնվում է մեր հասարակությունը և հասարակության ընկալումները Ռուսաստանի հետ կապված՝ կարող է մտավախություն առաջացնել իրենց մոտ և Պուտինն այդ պլանավորված այցը չեղարկի։Պատրուշևը գալիս է տրամադրություններ շոշափելու և նաև՝ մեկ անգամ ևս հանդիպելու իրենց հարմար զրուցակիցներին, համախոհներին, շոշափել բոլոր կողմերը։ Դա է Պատրուշևի այցի գլխավոր նպատակը»,-«Առաջին լրատվական»-ի հետ զրույցում ասաց նա։
Մեր զրուցակիցը հավելեց.«Հասարակության մեջ առկա որոշակի տարակուսությունները դեռ շարունակում են մնալ, երբեմն մի քիչ ավելանում կամ պակասում են։ Տարակուսանքի աստիճանը սովորաբար իջնում է Փաշինյանի ելույթից հետո, բայց իշխանության գործողությունների ֆոնին նորից սկսում է բարձրանալ, ալիքաձև է։Անձամբ ես սպասում եմ իշխանության կողմից հստակ, վճռական քայլեր, որոնք մինչ օրս դեռ չեմ տեսնում»։
Միևնույն ժամանակ Վարդանյանը շեշտեց՝ վարչապետ Փաշինյանի Ստեփանակերտում ունեցած ելույթը Ռուսաստանում այնքան էլ մեծ հիացմունքով չեն ընդունել.«Իհարկե, դա հասկանալի է, ինչպե՞ս կարող էին հիացմունքով ընդունել, երբ այնտեղ բավականին հստակ հայտարարություններ հնչեցին՝ կոշտ, կտրուկ։ Ես դրական եմ գնահատում այդ ելույթը, մի քանի անգամ մեծ հիացմունքով լսել եմ, փորձել եմ ավելի խորը վերլուծել այն, ինչ ասվել է վարչապետի կողմից։ Իհարկե Ռուսաստանը շատ բացասական է ընդունում այդ տեսակետները և գուցե նաև այդ եկույթի հետ կապված ինչ-որ հարցեր Պատրուշևը կփորձի այստեղ շոշափել, որովհետև նա շատ ազդեցիկ ֆիգուր է ռուսաստանյան քաղաքական ասպարեզում։ Անկասկած նրա այցը բավականին կարևոր հետևանքներ պետք է ունենա։Եթե մենք ելնենք Նիկոլի հնչեցրած հայտարարություններից՝ առաջին հերթին «Արցախը Հայաստան է և վերջ» հայտարարությունից, բավականին հստակ զգուշացում կա արտաքին ուժեին՝ իսկ մենք առաջին հերթին դրա տակ պատկերացնում ենք պուտինյան Ռուսաստանը, որ նրանք չխառնվեն Հայաստանի ներքին գործերի մեջ և մասնավորապես Արցախում կայանալիք նախագահական և խորհրդարանական ընտրություններին։ Կարծում եմ, որ այդ տրամաբանության շարունակությունը պետք է լինի Պատրուշևի հետ բանակցություններում նրան հստակ հասկանցելը, որ մենք մեր ընտրած ճանապարհից չենք շեղվելու, որևէ ճնշումների ու ազդեցության դեպքում մենք չենք նահաջելու։ Դա ոչ թե իշխանության, այլ մեր հայ ժողովրդի ընտրած ճանապարհն է, դա ոչ միայն հայաստանցիների, այլ ամբողջ հայոց աշխարհի որոշումն է ու դրա դեմ պայքարելն անիմաստ է»։