«Այս հռետորաբանությունը դեռ կարելի է ընդհանուր դիտարկել Իրանում նախընտրական շրջափուլում: Դեռ մեկ տասնամյակ առաջ՝ Մահմուդ Ահմադինեժադի ժամանակաշրջանում, երբ սրված էին հարաբերությունները Միացյալ Նահանգների հետ, Իրանը մշտապես օգտագործել է այսպիսի հռետորաբանություն: Ինչ վերաբերում է անվտանգության խնդիրներին, նախ և առաջ, Իրանի ուղերձն ուղղված էր տարածաշրջանի, Պարսից ծոցի տարածաշրջանի երկրներին: Իրանն իր վերջին գործողություններով փորձ է անում ընդգծել, որ Պարսից ծոցի տարածաշրջանը գտնվում է Իրանի ազդեցության գոտում, և Իրանն է այստեղ որոշում կայացնողը»,- «Առաջին լրատվական»-ի հետ զրույցում ասաց իրանագետ Արմեն Իսրայելյանը՝ անդրադառնալով Իրանի նախագահ Հասան Ռոհանիի հայտարարությանը, որի համաձայն՝ Իրանի դեմ հնարավոր պատերազմը կլինի բոլոր պատերազմների «մայրը»:
Մեր զրուցակցի խոսքերով՝ և՛ Իրանի նախագահը, և՛ արտգործնախարարը ընդգծել են, որ տարածաշրջանում անվտանգության երաշխավորն Իրանն է՝ այսպիսով փորձելով համագործակցության կոչ անել տարածաշրջանի երկրներին, մյուս կողմից էլ զգուշացնելով, որ Իրանի դեմ հարձակումների դեպքում խնդիրներ են ունենալու տարածաշրջանի երկրները:
Անդրադառնալով պաշտոնական Երևանի դիրքորոշմանը՝ Իսրայելյանը փաստեց, որ Հայաստանի համար մտահոգիչ է տարածաշրջանում տեղի ունեցող ցանկացած զարգացում, որը կարող է լարվածություն առաջացնել հարևան երկրներում, մասնավորապես Իրանի դեպքում, որի հետ անմիջական սահման ունենք: «Հայաստանը, ցավոք սրտի, չունի ուղղակի ազդեցություն՝ կանխելու Իրան-ԱՄՆ կամ տարածաշրջանում հնարավոր հակամարտությունները, բայց անշուշտ պետք է գնահատել հնարավոր ռիսկերը՝ տարբեր մակարդակներում: Պետք է լուրջ ուսումնասիրություններ կատարվեն, սցենարներ մշակվեն և տարվեն աշխատանքներ: Իրանի դեպքում վստահաբար կարող եմ ասել, որ և դիվանագիտական խողովակների միջոցով և հանրային դիվանագիտությամբ փորձ է արվում տեսնել՝ ինչ զարգացումներ կարող են լինել»:
Առավել մանրամասն՝ տեսանյութում:
