Հայաստանի վարչապետը Ղրղըզստանում է, որտեղ մասնակցում է ԵԱՏՄ վարչապետների հավաքին: Հատկանշական է այն, որ այս օրերին Հայաստանում ու Ղրղըզստանում ծավալվում են ԵԱՏՄ-ի համար աննախադեպ իրադարձություններ՝ դատական, իրավական գործընթացներ նախկին նախագահների նկատմամբ: Եվ եթե Երևանում այդ գործընթացը ծավալվում է առանց բռնության ու բախումների, ապա Ղրղըզստանում նույնիսկ զոհ եղավ՝ նախկին նախագահ Աթամբաևին ձերբակալելու համար:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Հակոբ Բադալյանը, քաղաքագետ Ռոբերտ Ղևոնդյանը և Գերագույն խորհրդի նախկին պատգամավոր Ազատ Արշակյանը:
Հակոբ Բադալյանի խոսքով՝ Հայաստանի և Ղրղըզստանի միջև, որպես հետխորհրդային երկրներ, նմանություններ քիչ կան. «Նմանությունը նախկին նախագահների նկատմամաբ իրավական գործընթացներն են: Եվ գուցե նմանությունը նաև այն է, որ երկու նախկին նախագահներն էլ անթաքույց աջակցություն էին ակնկալում Ռուսաստանից՝ մասնավորապես Պուտինից, և մինչև հիմա ակնկալում են»:
«Ռուսական կողմը ակնհայտորեն նոր իշխանությանն է հանձնել Աթամբաևին, ճիշտ այնպես, ինչպես Հայաստանում նոր իշխանություններին, ՀՀ հասարակությանը և արդարադատությանը հանձնեց Սերժ Սարգսյանին և Ռոբերտ Քոչարյանին»,- ընդգծեց Ազատ Արշակյանը:
Ռոբերտ Ղևոնդյանի դիտարկմամբ՝ Ղրղըզստանում ծանր և պայթյունավտանգ իրավիճակ է. «Ղրղըզստանը կարող է գնալ քաղաքացիական պատերազմի ճանապարհով, քանի որ այնտեղ համայնքները ամբողջական համակարգեր են, որոնք կարող են այլ համակարգերի հետ մտնել մրցակցության մեջ և բերել ապակայունացման: Մեզ մոտ դա չկար, մեզ մոտ կային անձեր, որոնց վրա կարելի էր գտնել կոմպրոմատներ և այդ միջոցով լռեցնել նրանց»:
Մանրամասն՝ տեսանյութում: