Տավուշի մարզպետի կողմից վերջինիս նշանակումից անմիջապես հետո, Իջևանի ԲԿ-ի տնօրեն Ռուզաննա Գրիգորյանի աշխատանքից ազատման թեմային մենք մեկ անգամ արդեն անդրադարձել ենք։ Գրել էինք, որ մարզպետը իր նշանակումից մի քանի օր անց աշխատանքից ազատել էր «Իջևանի ԲԿ» ՓԲԸ-ի տնօրեն Ռուզաննա Գրիգորյանին, որը ԲԿ-ի տնօրեն է նշանակվել ՀՀ Տավուշի մարզպետի որոշումով՝ 2016թ․ մրցույթում հաղթելու արդյունքում։ Նրա հետ կնքվել էր 5 տարի ժամկետով աշխատանքային պայմանագիր։ Գրիգորյանն «Առաջին լրատվական»-ի հետ զրույցում պատմել էր, որ մինչև իր նշանակվելը բժշկական կենտրոնը ունեցել էր շուրջ 30 միլիոն դրամի պարտք։ Պարտքը երեք տարվա ընթացքում մարվել է, և ներկա պահին որևէ ֆինանսական պարտավորվածություն չկա։
Այս ամենի ֆոնին, սակայն, Գրիգորյանը նաև պատմել էր, որ մարզպետը նշանակվելուց հետո իրեն հրավիրել է խոսելու, կոշտ զրույց են ունեցել, որից հետո էմոցիոնալ ֆոնի վրա ազատման դիմում է գրել։ Սակայն խոսելով կոլեկտիվի հետ և սթափ դատելուց հետո, որոշել է դիմումը հետ վերցնել, քանի որ համարել է, որ ԲԿ-ում դեռ անելիքներ ունի։ Երեք աշխատանքային օրից գնացել է, որ դիմում գրի, որպեսզի ազատման դիմումը հետ վերցնի, սակայն մարզպետը պատասխանել է, որ արդեն որոշում է կայացրել իրեն աշխատանքից ազատելու մասին, և փոխանցել, որ կփորձեն իրեն աշխատանքով ապահովել։ Բայց երբ Գրիգորյանը զգացել է, որ իրեն անգամ բժշկի աշխատանքով չեն ապահովում, որոշում է կայացրել դիմել դատարան և իր ազատման որոշումը բողոքարկել ու դատական ճանապարհով վերականգնել իր իրավունքները։
Ռուզաննա Գրիգորյանը, սակայն, «Առաջին լրատվական»-ի հետ զրույցում ասաց, որ այս գործի հանգուցալուծումը նոր ինտրիգներով է ուղեկցվում։ Մասնավորապես, չսպասելով դատարանի որոշմանը, նախարարությունն արդեն մրցույթ է հայտարարել ԲԿ-ի նոր տնօրենի հաստիքի համար։ «Ես չգիտեմ իրական դրդապատճառը, որի համար ազատվել եմ աշխատանքից։ Կարծում եմ, որ այլևս նոր Հայաստանում չպետք է գործեն մեկ անձի հայեցողական մոտեցում պաշտոնի նշանակման հարցում՝ ղարաբաղցի-իջևանցի, ծանոթ-բարեկամ, երիտասարդ-տարիքով, արտոնյալներ-ոչ արտոնյալներ և այլն։ Որևէ հիմնավոր պատճառաբանություն չկա, թե ինչ չափանիշներով է առաջնորդվել մարզպետը ինձ ազատելու և իմ ազատումից հետո ժ/պ նշանակելու հարցում։ Համենայնդեպս, համաժամանակյա պաշտոնավարում չի եղել և սկզբունքային տարաձայնություն չէր կարող լինել։ Իսկ եթե դա կատարվել է իբրև բարեփոխումների համատեքստում, ապա նրանք զբաղված են ինքնախաբեությամբ։ Աշխատանքի գնահատման սկզբունքը պետք է լինի մասնագիտական ձեռնահասությունը, փորձը, արժանիքները և ձեռքբերումները։ Ես պաշտոնավարման ժամանակահատվածում պատշաճ և բարեխղճորեն կատարել եմ իմ առաքելությունը և ինձ վերապահված պարտականությունները։ Կարծում եմ, այն սկզբունքները և խնդիրները, որոնք առաջադրում է կառավարությունը՝ Տավուշի մարզում տեղայնացման անհրաժեշտություն ունի»,- ասաց Գրիգորյանը՝ հավելելով. «Օբյեկտիվ կասկած ունեմ, որ իրականությունը խեղաթյուրված է ներկայացվում, որի պատճառով էլ համապատասխան արձագանք չի տրվում պատկան մարմինների կողմից։ Իմ ազատումը կատարվել է օրենքի խախտումով, և ես այն բողոքարկել եմ դատարանում։
Օգոստոսի 13-ին դատարանը պետք է վճիռ կայացնի։ Սակայն մարզպետարանը կատարեց հերթական անհեթեթ քայլը. Օգոստոսի 1-ին առողջապահության նախարարության կայքում տեղադրվել է Իջևանի ԲԿ տնօրենի թափուր պաշտոնի մրցույթի հայտարարություն, իսկ մարզպետարանի կայքում այն տեղադրվել է օգոստոսի 5-ին։ Հետաքրքիր է, արդյոք իրենք տեղյա՞կ են, թե ինչ վճիռ պետք է կայացնի դատարանը, իսկ եթե ոչ, ապա ի՞նչ խնդիր են փորձում լուծել հրատապության սկզբունքով։ Քանի որ մինչև դատական պրոցեսի ավարտը, տարբեր միջոցներով, այդ թվում՝ տնօրենի ժ/պ-ի միջոցով հասկացրել են ինձ, որ եթե հետ չվերցնեմ հայցադիմումը, քրեական գործեր են կարվելու իմ և իմ կոլեգաների հանդեպ։ Այս ամենից հետո մտավախություն է առաջանում, որ մարզպետը, չցանկանալով ինձ հետ աշխատել, նախաձեռնում է նոր քայլեր, ամեն գնով դատարանի՝ հօգուտ ինձ հնարավոր որոշումը ի կատար չածելու համար։ Ես ուզում եմ իմանալ, արդյոք սա պատվե՞ր է հովանավորյալ որևէ մեկին այդ պաշտոնում նշանակելու, թե՞ անձնական հետապնդում։ Ի՞նչքանով են պատկան մարմինները տեղյակ այս խնդրին։ Ես համոզված եմ, որ միայն վարչապետի անաչառ մոտեցման և կամքի շնորհիվ կարող է այս հարցը օբյեկտիվ լուծում ստանալ: Ես մոլուցքով կպած չեմ պաշտոնի, մինչև դատարան դիմելը ես դիմել եմ մարզպետին՝ աշխատանքի տեղավորման հարցով, սակայն հարկ չեն համարել անգամ իմ մասնագիտությամբ աշխատանք տրամադրել։ Ես ապրել և ապրելու եմ Իջևանում։ Ես ծառայել և շարունակելու եմ ծառայել մարզի ազգաբնակչությանը։ Սա Իջևանն է, և վե՛րջ։ Այստեղ տեղ չունի որևէ խտրական, ապօրինի սկզբունք»։