Լուրեր
Համայնքների և բնապահպանների դիրքորոշումն Ամուլսարի հարցում չի փոխվել
  • 14:15
  • 2019-08-10
  • Դիտումներ՝ *

Ընդհանուր կներկայացնե՞ք Հայաստանում հանքաարդյունաբերության ոլորտում տիրող իրավիճակը․ «Առաջին լրատվական»-ի հարցին Հայկական բնապահպանական ճակատ (ՀԲՃ) քաղաքացիական նախաձեռնության անդամ Լևոն Գալստյանը պատասխանեց․ «Նախ նշեմ, որ հանքաարդյունաբերությունը, հատկապես մետաղական հանածոների արդյունահանումը, տնտեսական գործունեության մի այնպիսի տեսակ է, որն առավելագույն և շատ մեծ վտանգ է ներկայացնում բնության, միջավայրին և մարդկանց առողջությանը։ Դա վաղուց արդեն հայտնի և ընդունված փաստ է, և կարիք չկա այն ապացուցելու։ Անկախ միջոցներից, տեխնոլոգիաներից, դա գործունեության այնպիսի մի տեսակ է, որը շատ հաճախ անվերահսկելի և անդառնալի վնաս է հասցնում բնության, միջավայրին և մարդկանց առողջությանը։ Երբ խոսում ենք Հայաստանի մասին, մենք պետք է գնահատենք և հասկանանք Հայաստանի յուրօրինակություններն այդ առումով։ Հայաստանը լինելով շատ փոքր երկիր, արդեն ծանրաբեռնված է բավական լուրջ մետաղական հանքաարդյունաբերությամբ և դրա արգասիքներով»։

Լրագրող, Գնդեվազի բնակիչ Թեհմինե Ենոքյանն ասաց․ «Խնդրահարույց «Էլարդ» կազմակերպությանն է վստահվել մի փորձաքննություն, որը կարծես թե պետք է որոշիչ լինի։ Այդ փորձաքննությամբ է, որ Ամուլսարի շրջանակներում խնդրահարույց կետերը պետք է ի հայտ գան, բայց մենք չենք տեսել, թե ինչպես է ընտրվել այդ կազմակերպությունը, թե ինչպես է փորձաքննությունն իրականացվել, մեկ տարուց ավելի հարուցված քրեական գործերով Քննչական կոմիտեն որևէ քննություն չի իրականացրել, բնակիչների հետ աշխատանք չի տարվել։ Եվ անհասկանալի է, որ հանրության հետ, շահագրգիռ կողմերի հետ խոսակցություն չի եղել, չեն հրավիրել սեղանի շուրջ քննարկման, որպեսզի հասկանային, թե ինչ խնդրահարույց կետեր կան»։

Իսկ Հայկական բնապահպանական ճակատ (ՀԲՃ) քաղաքացիական նախաձեռնության անդամ Անի Խաչատրյանն էլ հավելեց․ «Ես հուսով եմ, որ մեր նոր կառավարությունը այնքան խելացի է, որ Ամուլսարը շահագործելու որոշում չի կայացնի։ Երբ հայտարարվեց, որ նոր փորձաքննություն պետք է իրականացվի, մեզ թվաց, թե նոր ջրի նմուշներ են վերցնելու, այսինքն՝ բոլորովին նոր փորձաքննություն է լինելու, բայց պարզվեց, որ ուղղակի ուսումնասիրվելու է «Լիդիան Արմենիա» ընկերության կողմից տրամադրված նյութերը։ Այսինքն՝ նրանց արված փորձաքննության արդյունքների հիման վրա է արվելու փորձաքննությունը։ Իսկ միջազգային անկախ բավականին հայտնի փորձագետներ տվել են իրենց եզրակացությունները ջրի հետ կապված, և ասել են, որ շատ մեծ ռիսկեր է պարունակում այս հանքի շահագործումը»։

 

 

Մանրամասները՝ տեսանյութում։

  • Դիտումներ՝ *