Լուրեր
BBC-ի հոդվածը պրովոկացիա էր ու պատվիրված. ԱԱԾ ու ՀՔԾ պետերի ձայնագրության ձեռագիրն է
  • 17:10
  • 2019-08-09
  • Դիտումներ՝ *

«BBC-ի հոդվածից ես ավելի շուտ տպավորություն ստացա, որ այն ավելի շատ նման է պրովոկացիայի։ Ես հակված եմ, որ սա պրովոկացիա է։ Չեմ կարող ասել, թե ինչու և ով է այն արել, բայց ես սա նմանեցնում են ԱԱԾ ու ՀՔԾ պետերի հեռախոսային ձայնագրությունների հրապարակմանը։

Նույն ձեռագիրն եմ տեսնում։ Բայց թե ինչու են արել, ինչու են հենց Օգանովսկու անունը տվել, չեմ կարող ասել»,- «Առաջին լրատվական»-ի տաղավարում քննարկման ժամանակ ասաց իրավապաշտպան Ժաննա Ալեքսանյանը։ Նրա խոսքերով՝ ինչքան Քոչարյանի գործով դատավարությունը հետաձգվում է, որի համար հենց պայքար է մղվում, և ամեն ինչ արվում է, որ այդ դատավարությունը չսկսվի, այնքան մենք այս փուլում շոկային բաների ականատես կլինենք։ «Ես, միանշանակ, ուղղակի կապ եմ տեսնում Քոչարյանի դատավարության ձգձգման և նման նյութերի հրապարակման մեջ։ Սա հստակ միտումով է արվում»,-ասաց տիկին Ալեքսանյանը։

Քննարկմանը մասնակից Մարտի 1-ի զոհերից Գոռ Քլոյանի հայրը՝ Սարգիս Քլոյանն էլ նկատեց, որ BBC-ի ասածը նորություն չէր։ Այն, ինչ ասել է այդ լրատվամիջոցը, մենք վաղուց գիտեինք։ «Մենք գործի նյութերին ծանոթանալով՝ գիտենք, որ Օգանովսկին 4 ժամ հարցաքննվել է։ Վկաները ցուցմունք են տվել, որ Օգանովսկին զինվորներից 60 հոգու կանգնեցրել և ասել է, որ եթե անհրաժեշտություն լինի՝ ո՞վ կկրակի ժողովրդի վրա։ 60 հոգուց 40-ին ընտրել են ու բերել Երևան։ Սա նորություն չէ։ Եթե դատավարությունը շուտ սկսվի, ամեն ինչ իր տեղը կընկնի։ Ժողովուրդը ինքը կիմանա՝ ինչ է կատարվել, ով է հրաման տվել։ Բոլոր հարցերի պատասխանները կտրվեն հենց դատավարության ժամանակ»,- ասաց Քլոյանը։

Իրավապաշտպան Ժաննա Ալեքսանյանը նշեց, որ BBC-ին գործի նյութերը տեղյակ մարդ է տվել և ուղղորդել՝ ինչ ուղղությամբ կառուցել այն։ Հոդվածը միտում ունի շեղելու հանրությանը, հետաձգելու դատավարությունը։ «Դժվար է BBC-ի հասցեին նման բան ասել, բայց սա պատվիրված հոդված է»,- ասաց Ալեքսանյանը։ Իրավապաշտպանն անհրաժեշտություն չի տեսնում, որպեսզի քրեական գործ հարուցվի գործի նյութերի արտահոսքի համար, քանի որ այդ նյութերը արդեն իսկ ավարտված նախաքննությունից են և հասանելի են բավական մեծ թվով մարդկանց։

Առավել մանրամասն՝ տեսանյութում։

  • Դիտումներ՝ *