ԱԺ ՕԵԿ խմբակցության պատգամավոր Իշխան Խաչատրյանը մարտի 26-ին Կառավարության հետ հարցուպատասխանի ժամանակ դիմելով Պաշտպանության նախարարին, նշեց, որ ողջունելի քայլ է ԶՈՒ վիճակահանության միջոցով զորակոչի կազմակերպումը: Նրա խոսքով՝ սա կոռուպցիոն ռիսկերի նվազմանը նպաստող նորարարություններից է, և հասարակության մեջ արդեն նկատելի է դրական վերաբերմունքը: Պատգամավորը, սակայն, նշեց, որ վերջերս մամուլում տեղեկություններ են տարածվում, թե գարնանային զորակոչը վիճակահանությամբ չի լինելու, ապա հետաքրքրվեց՝ որքանո՞վ են հավաստի այս տեղեկությունները:
Պաշտպանության նախարար Սեյրան Օհանյանը նախ՝ շնորհակալություն հայտնեց հարցի համար՝ նշելով, որ այն բավական տեղին է տրված, ապա տեղեկացրեց, որ գործընթացը ցույց է տալիս մի բան՝ տարեցտարի բարելավվում է ԶՈՒ համակարգը, դա իր՝ նախարարի, և ԶՈՒ ղեկավարության սկզբունքներից մեկն է: «Բարեփոխումների ընթացքում մենք հետադարձ ճանապարհ չունենք, եթե սկսել ենք մի գործունեություն, ապա պետք է այն իրականացնենք մինչև վերջ: Այս ընթացքում որևիցե մեկը չի դիմել ինձ, որպեսզի իր երեխային ուղարկեն այս կամ այն ծառայության վայրը: Մենք շարունակելու ենք այդ գործընթացը, դիմադրություն որոշակի չափով զգում ենք, բայց այս ծրագրերի իրականացման շրջանակում կարող եմ ասել, որ կոռուպցիոն ռիսկերն արդեն համակարգային բնույթ չեն կրում»,-պատասխանեց նա:
