ԱՄՆ նախագահ Դոնալդ Թրամփը խոստովանել է, որ ոգելից խմիչքներ չի օգտագործում ալկոհոլային կախվածությունից վախի պատճառով: Այդ մասին Միացյալ Նահանգների առաջնորդն ասել է The Washington Post-ին տված հարցազրույցում:
Թրամփի խոսքերով, ալկոհոլ չխմելու իր որոշման վրա ազդել է հանգուցյալ ավագ եղբոր՝ Ֆրեդի ալկոհոլիզմը:
«Նա գեղեցիկ տղամարդ էր, և ես տեսնում էի, թե ինչ է անում ալկոհոլը նրա օրգանիզմի հետ»,- խոստովանել է ամերիկացի առաջնորդը:
Թրամփը վստահ է, որ ալկոհոլի նկատմամբ հակում առկա է նաև իր գենետիկայում:
«Ենթադրենք, ես սկսեի խմել: Միանգամայն հնարավոր է, որ ես չէի խոսի ձեզ հետ հենց հիմա»,- ասել է Թրամփը:
Համալսարանն ավարտելուց հետո Ֆրեդ Թրամփ-կրտսերը կարիերան սկսել է որպես օդաչու TWA ավիաընկերությունում, բայց հայրը պնդել է, որ նա զբաղվի ընտանեկան բիզնեսով: Արդյունքում երիտասարդը սկսել է խմել, նրան հեռացրել են աշխատանքից, որից հետո Ֆրեդն աշխատանքի է անցել հոր ընկերությունում: Նա մահացել է 1981 թ.-ին՝ ալկոհոլիզմի հետևանքներից:
