ԱՄՆ նախագահ Դոնալդ Թրամփը հայտարարել է, որ դժգոհ է դոլարի կայուն կուրսից: Նրա կարծիքով, դա խանգարում է ամերիկյան ընկերությունների մրցակցությանը համաշխարհային շուկայում: Այս մասին նա գրել է Twitter-ում:
«Որպես ձեր նախագահ, գուցե մտածեք, որ ես ուրախ կլինեի մեր շատ ուժեղ դոլարով: Բայց ես ուրախ չեմ»,- նշել է քաղաքական գործիչը:
Թրամփը շեշտել է, որ ազգային արժույթը պետք է թուլացնել: «ԴՊՀ-ի բարձր տոկոսադրույքները, համեմատած այլ երկրների հետ, դոլարը բարձր մակարդակի վրա են պահում, ինչի արդյունքում մեր գերազանց արտադրողներին ավելի ու ավելի դժվար է դառնում մրցակցությունը»,- եզրափակել է նա:
Հուլիսի վերջին ԱՄՆ Դաշնային պահուստային համակարգն իջեցրել է իր բազային տոկոսադրույքը: Դա վերջին տասը տարիների ընթացքում տեղի է ունեցել առաջին անգամ: Տոկոսադրույքի նոր թիրախային ցուցանիշ է սահմանվել տարեկան 2-2.25 տոկոսը: Թրամփն այդ անկումը համարել է անբավարար և ենթադրել է, որ շուկան ցանկանում է լսել «տոկոսադրույքների իջեցման երկարատև և ագրեսիվ ցիկլի սկզբի մասին, որպեսզի համաքայլ ընթանան Չինաստանի, Եվրամիության և աշխարհի այլ երկրների հետ»:
Ինչպես հաղորդել է Reuters-ը, ԱՄՆ նախագահը ցանկանում է թուլացնել դոլարը: Ավելի էժան արժույթը կարող է խթանել ամերիկյան տնտեսությունը և, հավանաբար, ձեռնտու է Թրամփին՝ երկրորդ ժամկետի առաջադրման հեռանկարում: Միևնույն ժամանակ, արժույթի հետ մանիպուլյացիաները կարող են վտանգել դոլարի՝ որպես համաշխարհային պահուստային արժույթի կարգավիճակը և արժութային պատերազմ հրահրել: