Լուրեր
BBC-ի հրապարակումը քաղաքական սադրա՞նք. ՀՀ իրավապահ մարմինները պետք է զբաղվեն՝ որտեղից է արտահոսքը

Հայաստանի ԱԱԾ տնօրեն Արթուր Վանեցյանն Արցախում լրագրողների հետ զրույցում հայտարարել է, որ հեղափոխությունից հետո ԱԱԾ-ի անհետացած փաստաթղթերի մեծ մասը վերականգնվել է, դրանք առնչվում են Մարտի 1-ի գործին և փոխանցվել են նախաքննական մարմնին՝ Հատուկ քննչական ծառայությանը: Արթուր Վանեցյանի հայտարարությունը փաստացի զուգորդվում է BBC-ի ռուսական ծառայության հրապարակած ծավալուն նյութի հետ, որտեղ նշվում է, որ Մարտի 1-ի սպանություններն իրականացրել է Ացախից բերված ջոկատը: Հրապարակման մեջ չկա տեղեկություն, որ այս հարցը հայկական մամուլում երբևէ չի շոշափվել, սակայն այդ հանգամանքն էլ ավելի է հետաքրքիր դարձնում, թե ինչու հիմա և ինչու է BBC-ի ռուսական ծառայությունը թարմացնում արցախյան ջոկատի թեման և փաստորեն թիրախավորում Արցախը, այն էլ վարչապետի օգոստոսի 5-ի արցախյան ելույթից հետո:

Թեմայի շուրջ «Առաջին լրատվական»-ի հետ քննարկմանը մասնակցեցին Իրավաբանների հայկական ասոցիացիայի հակակոռուպցիոն փորձագետ Սյուզաննա Սողոմոնյանը, քաղաքագետներ Ռուբեն Մեհրաբյանը և Էդգար Վարդանյանը:

Ռուբեն Մեհրաբյանի կարծիքով՝ հրապարակման մեջ որևէ նոր բան և Հայաստանի դեմ որևէ բան չկա: «Բովանդակային առումով այնտեղ սենսացիա չկար, և այդ նյութը գրելու համար ամենևին էլ կարիք չկար գաղտնի նյութերի հետ ծանոթանալ, հայկական մամուլում այդ ամենն արծարծվել է: Օրինակ՝ հնարավոր էր իրավապաշտպան Սեդա Սաֆարյանի անունը Google-ում հավաքել, սղագրել նրա ասածները, վերածել տեքստի և թարգմանել ռուսերեն… Ավելի շատ գործ ունենք հիշողության թարմացման գործընթացի հետ»,- նշեց քաղաքագետը:

Սյուզաննա Սողոմոնյանի կարծիքով՝ BBC-ի հրապարակած նյութը պետք է քննության առնվի. «Ինչքան էլ մեզ փաստերը հայտնի են, միևնույն է, իրավապահ մարմինները պետք է քննություն ձեռնարկեն և պարզ դառնա՝ արդյո՞ք նախաքննական տվյալ հանդիսացող տեղեկություններ հրապարակվել են, թե ոչ: Եթե պարզվի, որ իսկապես եղել է տեղեկատվության արտահոսք և որ հրապարակված տղեկությունները համարվում են նախաքննական գաղտնիք, ապա մենք գործ ունենք նաև Հայաստանի անվտանգության հետ կապված խնդրի հետ: Հայաստանյան կողմը միջոցներ պետք է ձեռնարկի և իրավական գնահատական տա»:

Էդգար Վարդանյանի դիտարկմամբ՝ BBC-ն հեղինակավոր լրատվամիջոց և նրա համար հետաքրքիր է այն, ինչ տեղի է ունենում Հայաստանում «Ինչո՞ւ պետք է ենթադրել, որ նրա կողմից նման նյութի հրապարակումը անպայման կարող է դավադրության ծրագրի մաս լինել… Հնարավոր է BBC-ն ունի անանուն աղբյուր, հնարավոր է տեղեկատվությունը ձեռք է բերել հակերային հարձակման արդյունքում և հնարավոր է նաև լրագրողը հայաստանյան մամուլից է օգտվել, և փորձել են առաջինը իրենք խոսել այս տեսանկյունից»,- նշեց քաղաքագետը՝ հավելելով, որ ՀՔԾ-ն այսօր հայտարարել է, որ ինքն այդ տեղեկատվությունը պաշտոնապես չի տվել, և պետք է դա ի գիտություն ընդունել:

Մանրամասն՝ տեսանյութում:

  • Դիտումներ՝ *