Արցախի մայրաքաղաք Ստեփանակերտի Վերածննդի հրապարակում ՀՀ վարչապետ Նիկոլ Փաշինյանը Հայաստանում տեղի ունեցած թավշյա հեղափոխությունը հռչակեց համահայկական հեղափոխություն՝ հայտարարելով, որ այն տարածվում է Հայաստան-Արցախ-Սփյուռք եռամիասնության վրա: Ինչպես Սփյուռքը դարձնել հեղափոխության շահառու: Այս թեմայի շուրջ «Առաջին լրատվական»-ի հետ զրուցում հաղորդավար, պրոդյուսեր Ստեփան Փարթամյանն ընդգծեց, որ նախևառաջ հեղափոխություն պետք է լինի նաև Սփյուռքում. «Եթե Հայաստանում 30 տարի միատիրություն կար, ապա Սփյուռքում հարյուր տարի է միատիրություն է, կազմակերպությունների հակասությունները միմյանց նկատմամբ փոխանցվել է սերնդեսերունդ: Այսօր Սփյուռքը կարիք ունի հեղափոխության, մտածելակերպի փոփոխության: Սփյուռքյան կազմակերպությունների սխալները կրկնվում են, և չեն վերլուծում՝ իրենք հաջողված են, թե ոչ»:
«Այսօր չկա մաքուր հայկական մշակույթ, Հայաստանից դեպի Սփյուռք եկած մշակույթն ինքնին աղբ է»,- նշեց մեր զրուցակիցը՝ հավելելով, որ կողմնակից է մշակութային հեղափոխությանը:
«Մշակութային ոստիկանություն եմ ստեղծել Ֆեյսբուքյան էջում, «ոստիկանապետը» ես եմ, և ընդգրկվել են բազմաթիվ «ոստիկաններ», որոնք ուղղում են և թույլ չեն տալիս օտար բառերի ընդգրկումը Հայաստան աշխարհում»,- նշեց հաղորդավարը՝ հավելելով, որ Երևանում օտար բառեր գործածելու անհրաժեշտություն չկա: Նրա դիտարկմամբ՝ ազգային մշակույթի թշնամին ազգի թշնամին է:
«Ես Հայաստան վերադարձա ոչ թե հայրենասիրության, այլ իմ եսաիրության պատճառով…»,- խոստովանեց մեր զրուցակիցը: «Իմ ոչ հանրային երեսը ուսումնասիրություններն են,- նշեց Փարթամյանը,- նպատակ ունեմ ներկայացնել, թե հայերն ինչ ներդրումներ են ունեցել մարդկության համար Ցեղասպանությունից հետո: Առաջադիմելու համար պետք է ցեղապրումով առաջ գնանք»:
Մանրամասն՝ տեսանյութում: