«Ընդհանրապես, եթե պետություններն իրենց առջև խնդիր են դնում իրականացնել երկարաժամկետ ծրագրեր՝ մշակում են ազգային ռազմավարական ծրագրեր։ Նման հայտարարությունները իրենց հիմքում պետք է որ ունենան ազգային ռազմավարություն։ Բայց ամեն դեպքում շատ դրական է, որ քաղաքական իշխանությունն իր առաջ ամբիցիոզ ծրագրեր է դնում՝ մտածելով ոչ թե վաղվա օրվա, այլ մյուս կամ ավելի երկարաժամկետ կտրվածքով»,- «Առաջին լրատվական»-ի տաղավարում, քննարկման ժամանակ անդրադառնալով վարչապետի արցախյան ելույթին, ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը՝ հավելելով, որ միևնույն ժամանակ, առկա ռեսուրսներով հնարավոր չէ նման ամբիցիոզ ծրագրեր իրականացնել։
Քննարկմանը մասնակից ԱԺ «Իմ քայլը» խմբակցության պատգամավոր Միքայել Զոլյանը նկատեց, որ կա ամբիցիոզ խնդիրներ դնելու և ինչ-որ տեղ նաև ձևակերպելու հայկական երազանքը։ «Էն ամեն ինչը, որ պետք է լինի 2050 թվականին, այդ ցուցանիշները կարող են փոփոխվել։ Բացառված չէ, որ այդ թվերի առումով շատ բան կարող է փոխվել։ Բայց վարչապետի ելույթը քննարկման առաջարկ էր, և տրվեց կոնցեպցիա, թե ինչպիսի երկիր պետք է լինի Հայաստանը, և ինչպիսի ազգ պետք է լինի հայ ժողովուրդը 2050 թվականին։ Եվ սա միայն կառավարության անելիքների մասին չէր խոսքը, այլ ամբողջ հայ ժողովրդի»,- ասաց Զոլյանը՝ հավելելով, որ վարչապետի ելույթը նաև քննարկումներ խթանելն էր։
Տարոն Սահակյանն էլ նկատեց, որ այսօրվա խնդիրն այն է, որ հարցերը չեն բարձրացվում ինստիտուցիոնալ մակարդակում, այլ հուզական մակարդակում, բայց այսօրվա իշխանությունը հուզականության կարիք չունի, քանի որ ունի բացարձակ իշխանություն և վստահությունը վարչապետի անձի նկատմամբ։ Միքայել Զոլյանը համաձայնեց, որ ռացիոնալիզմը պետք է գերակայի, բայց վարչապետի ելույթը միայն ՀՀ քաղաքացիներին ուղղված չէր, ներքին սպառման համար չէր միայն։ Այդ հրապարակում հավաքված էին սփյուռքահայեր, և նման տոնայնությամբ ելույթն ուղղված էր ամբողջ հայությանը։
Առավել մանրամասն՝ տեսանյութում։