«Ո՞վ է կրակել ցուցարարներին Երևանում 2008 թվականին. նախաքննությունը մատնանշում է Ղարաբաղի ջոկատը» այսպիսի վերտառությամբ հրապարակում է հայտնվել ԲիԲիՍի-ի ռուսերեն կայքում: ԲիԲիՍի-ի ձեռքում են հայտնվել Մարտի 1-ի գործի վերաբերյալ ՀՔԾ փաստաթղթեր, որոնք փաստում են, որ ցուցարարների վրա կրակել է Ղարաբաղից բերված խումբը՝ գեներալ Սամվել Կարապետյանի՝ Օգանովսկու հրամանատարությամբ: Կարապետյանն իր ենթականերից ձևավորած հատուկ խումբը տեղավորել է Բաղրամյան 26-ում գտնվող նախագահական նստավայրի նկուղում: Այնտեղ խմբի անդամներին մի քանի անգամ այցելել են Ռոբերտ Քոչարյանը և Սերժ Սարգսյանը:
Փաստորեն կան առանցքային դեմքեր, որոնց անունները պարբերաբար շրջանառվում են և որոնց նկատմամբ հանրությունն ընդգծված վերաբերմունք ունի, բայց նրանք կալանավորված չեն, ավելին՝ օրերս Գեղամ Պետրոսյանն ազատվեց կալանքից: Կա՞ն մտահոգություններ՝ կապված այս քրեական գործի հետ: «Առաջին լրատվական»-ի հետ թեմայի շուրջ զրույցում, անդրադառնալով այս հարցին, քաղբանտարկյալ Տիգրան Բաղդասարյանն ընդգծեց, որ անշուշտ կան մտահոգություններ. «Սա շատ մեծ ծավալի գործ է, և տասը տարի շարունակ իշխանությունները փորձել են կոծկել, և այսօր իրավապահների համար բացահայտումը շատ է բարդացել: Չնայած պարզից էլ պարզ է, թե կազմակերպիչներն ովքեր են, կատարողներն ովքեր են, բայց ահագին փաստաթղթեր, ապացույցներ վերացվել են… Մինչև չպատժվեն Մարտի 1-ի հանցագործները, մենք ո՛չ խաղաղ երկինք կունենանք, ո՛չ ազատ հասարակություն, ո՛չ էլ բոլորը հավասար կլինեն օրենքի առաջ»:
Քաղբանտարկյալ Սամվել Հարությունյանի խոսքով՝ ցավոք դատական համակարգում մեծ մասը նախկին համակարգի ներկայացուցիչներ են,ովքեր մասնակցել են փաստերի խեղաթյուրմանը. «Հույս ունենք, որ սայլը տեղից անպայման կշարժվի»:
Անդրադառնալով դիտարկմանը, որ Մարտի մեկին սպանված Զաքար Հովհաննիսյանի սպանության մեջ մեղադրվող Գեղամ Պետրոսյանը օրերս կալանքից ազատ է արձակվել, մինչդեռ Ռոբերտ Քոչարյանը շարունակում է մնալ մեկուսարանում, Տիգրան Բաղդասարյանը նշեց. «Փաստերը շատ են, որ այդ ամեն ինչի ամենագլխավոր կազմակերպիչը Ռոբերտ Քոչարյանն է… Միգուցե Գեղամ Պետրոսյանը խոստովանել է, որ Քոչարյանը հրամանը տվել է, ինքը կատարել է, և հնարավոր է, որ այդ հիմքով են նրա խափանման միջոցը փոխել: Չէին կարող նրան առանց լուրջ փաստերի կալանավորել, և չէին կարող առանց լուրջ փաստերի ազատել»:
Մանրամասն՝ տեսանյութում:
