BBC-ն հասանելիություն է ստացել Հայաստանի ժամանակակից պատմության ամենաողբերգական իրադարձություններից մեկի հետաքննության փաստաթղթերին՝ 2008-ի մարտի 1-ի, երբ Երևանում բողոքի ցույցերի ժամանակ 10 մարդ է զոհվել։
Հետաքննությունը համարում է, որ ցուցարարներին գնդակահարելու հրաման է տվել գեներալ մայոր Սամվել Կարապետյանը (Օգանովսկի)։
Բացի այդ, քննչական փաստաթղթերում խոսվում է նաև երկու նախկին նախագահի և երկու ազդեցիկ գործարար պատգամավորի մասին։
2008-ի փետրվար-մարտի իրադարձությունների նոր հետաքննություն է ընկած ՀՀ նախկին նախագահ Ռոբերտ Քոչարյանի նկատմամբ գործընթացների հիմքում։
Բացի քաղաքական նշանակությունից, հետաքննության ավարտին են սպասում նաև զոհերի հարազատները։
Գործի նյութերից պարզ է դառնում, որ, ըստ քննիչների՝ ցուցարարների ուղղությամբ կրակ են բացել Ղարաբաղից բերված ուժայինները, որոնց հրամանատարը գեներալ Սամվել Կարապետյանն է (գործով անցնում է որպես վկա)։ Բացի այդ, ջոկատը տեղակայված է եղել Բաղրամյան 26 հասցեում գտնվող նախագահական նստավայրի նկուղում։ Հետաքննությունը պնդում է․ ջոկատին այցելել են երկու նախագահները՝ Ռոբերտ Քոչարյանը և Սերժ Սարգսյանը։
Քննիչները նաև ստուգում են ազդեցիկ գործարարներ Գագիկ Ծառուկյանի և Սամվել Ալեքսանյանի դերը, որոնք կարող էին ֆինանսավորել Երևան ժամանած ուժայիններին։ Վերջինները հերքում են այդ պնդումները։
2008-ի իրադարձությունների նոր հետաքննությունը սկսվեց Նիկոլ Փաշինյանի նախաձեռնությամբ, որն իշխանության եկավ բողոքի ցույցերի արդյունքում։
