Երեկ վարչապետ Նիկոլ Փաշինյանն իր ելույթում ներկայացրել է մինչև 2050 թվականը Հայաստանի ռազմավարական նպատակադրումների նախագիծը։ Դրանց թվում են՝ Հայաստանի բնակչությունը հասցնել 5 միլիոնի, ստեղծել 1,5 միլիոն աշխատատեղ, ապահովել առնվազն 2,5 միլիոն մարդու զբաղվածությունը, վերացնել աղքատությունը, Հայաստանը դարձնել արդյունաբերական երկիր, տասնհինգապատկել Հայաստանի ՀՆԱ-ն, յոթնապատկել միջին աշխատավարձը և այլն։
Ո՞րն է ձեր կարծիքն այս երկարաժամկետ նախագծի հետ կապված, որքանո՞վ է այն նպատակային․ «Առաջին լրատվական»-ի հարցին Հայաստանի գործատուների հանրապետական միության գործադիր տնօրեն Գագիկ Մակարյանը պատասխանեց․ «Բնակչության թվաքանակն ավելացնելը շատ կարևոր է Հայաստանի տնտեսության համար, որովհետև ներկայիս փոքր բնակչությամբ երկիրը փոքր ու միջին ձեռնարկատիրությանն առանձնապես չի խթանում, տեղական շուկան բավականին սահմանափակված է՝ որոշ ոլորտներում գերհագեցված է։ Հազարավոր փոքր ընկերություններ, որոնք զբաղվում են առևտրով, փոքր արտադրություններով կամ ծառայություններով, ցածր եկամտաբերությամբ են աշխատում։
Ավելին ասեմ՝ մեր վերջին վերլուծությունները, որոնք մենք ամփոփում ենք ՓՄՁ-ների հետ կապված, հարցմանը՝ արդյոք ձեր եկամուտները բավարարո՞ւմ են հագուստ, սնունդ կամ նաև թանկարժեք ինչ-որ ապրանքներ՝ հեռուստացույց, սառնարան, ավտոմեքենա, տուն ձեռք բերելուն, 49 տոկոսը նշել էր, որ իրենց եկամուտը բավարարում է միայն սննդի և հագուստի համար»։
«Մենք ունենք շուկան մեծացնելու մի քանի ճանապարհ։ Մի ճանապարհը՝ եղած բնակչության թվաքանակի պայմաններում նրանց գնողունակությունը բարձրացնելն է, այսինքն՝ նրանց եկամտաբերությունը պետք է ավելացվի։ Երկրորդ ճանապարհը՝ բնակչության թիվն ավելացնելն է․ հայրենադարձությամբ կամ գեներացնելով ընտանիքներում ավելի մեծ թվով երեխա ունենալը։ Եվ երրորդ տարբերակը՝ տուրիզմի միջոցով»,- հավելեց Գագիկ Մակարյանը։
Մանրամասները՝ տեսանյութում։
