Երեկ ՈՒԵՖԱ-ի շտաբ-բնակարանում տեղի ունեցավ Եվրոպա լիգայի որակավորման վերջին` չորրորդ փուլի վիճակահանությունը: Հայաստանի չեմպիոն «Արարատ-Արմենիան» վրացական «Սաբուրթալոյի» արգելքը հաղթահարելու դեպքում Եվրոպա լիգայի փլեյ-օֆֆում կմրցի «Դյուդելանժ» (Լյուքսեմբուրգ)-«Նիմե Կալյու» (Էստոնիա) զույգի հաղթողի հետ: Ավելի լավ վիճակահանություն հայկական թիմի համար ուղղակի դժվար էր պատկերացնել: Պատմության մեջ առաջին անգամ իրական հնարավորություն ենք ստացել Եվրոպա լիգայի խաղարկության խմբային փուլում ներկայացուցիչ ունենալու, ինչը հայկական ֆուտբոլի համար մեծ իրադարձություն կլինի: Հիշեցնենք, որ այսօր՝ ժամը 19-ին, Վազգեն Սարգսյանի անվան «Հանրապետական» մարզադաշտում «Արարատ-Արմենիան» Եվրոպա լիգայի որակավորման երրորդ փուլի առաջին հանդիպումը կանցկացնի վրացական թիմի հետ:
««Արարատ-Արմենիան» շատ ավելի ուժեղ մրցակից է, քան հաջորդ փուլում մեր հավանական մրցակիցները: Դա է պատճառը, որ մենք կենտրոնացած ենք միայն հայկական թիմի հետ դիմակայության վրա: Կարծում եմ՝ 2 թիմերի համար հաջող վիճակահանություն էր: Հայերն ու վրացիները լավ հարաբերություններ ունեն: Չեմ կարող հստակ նշել, թե Վրաստանից քանի երկրպագու է ժամանել Երևան: Վաղը ցույց կտանք մեր խաղը: Ակնկալում ենք միայն հաղթանակ: Ամեն ինչ կորոշվի Թբիլիսիում»,- երեկ լրագրողների հետ հանդիպման ժամանակ ասել էր «Սաբուրթալոյի» գլխավոր մարզիչ Գեորգի Չիաբրիշվիլին: Վերջինս ըստ էության ակնարկել է, որ հայ-վրացական դիմակայության հաղթողը հաստատուն քայլ կկատարի դեպի Եվրոպա լիգայի խմբային փուլ:
Երեկ տեղի ունեցած վիճակահանությունը լրացուցիչ լիցքեր հաղորդեց դիմակայության կողմերին՝ էլ ավելի բարձրացնելով դրա արժեքը: «Արարատ-Արմենիայի» գլխավոր մարզիչ Վարդան Մինասյանը չի խոսել փլեյ-օֆֆի հնարավոր մրցակիցների մասին՝ առաջին հերթին կարևորելով «Սաբուրթալոյի» հետ մրցավեճը: «Ուսումնասիրել ենք մրցակցին, չեմ նշի թույլ կողմերը՝ հասկանալի պատճառներով: Կասեմ, որ տեխնիկապես լավ պատրաստված թիմ ունեն, սիրում են գնդակով խաղալ, և փոխհամագործակցությունը բարձր մակարդակի վրա է: Տղաներն այժմ լավ մարզավիճակում են, վնասվածքներ չկան, թիմը խաղից խաղ ավելի լավ է գործում, բայց ավելացնելու տեղ կա: Կփորձենք մեր առավելագույնն անել: Չեմ կարող ասել՝ լավ է թե վատ, որ առաջինը տանն ենք խաղում, միայն կնշեմ, որ այդ իրավիճակում մարտավարությունները տարբեր են»,- նշել է հայ մասնագետը:
Գլխավորելով «Արարատ-Արմենիան»՝ Մինասյանը էապես բարելավեց այս թիմի վիճակը: Մասնավորապես, առաջնության առաջին հատվածում «Արարատ-Արմենիան», ունենալով ուժեղ կազմ, իր հնարավորություններից խիստ ցածր էր ելույթ ունենում: Բելառուս մասնագետ Վադիմ Սկրիպչենկոյին ոչ մի կերպ չէր հաջողվում ձևավորել մարտունակ կոլեկտիվ: Մինասյանն «Արարատ-Արմենիային» չեմպիոն դարձրեց, ու հիմա հայկական ակումբը գտնվում է խիստ կարևոր մի հանգրվանում: Ուշագրավ մի փաստ․ Վարդան Մինասյանի առաջ կրկին հնարավորություն է ստեղծվել գրանցելու հայ երկրպագուի համար երազանք դարձած արդյունքը: Մինասյանը Հայաստանի հավաքականի միակ գլխավոր մարզիչն է, ում գլխավորությամբ մեր ընտրանին մոտ է եղել Եվրոպայի և աշխարհի առաջնության եզրափակիչ փուլում հայտնվելուն: 2012 թվականի Եվրոպայի առաջնության ընտրական փուլում Հայաստանի հավաքականը ենթախմբում երրորդ հորիզոնականը զբաղեցրեց՝ ցույց տալով բոլոր ժամանակների լավագույն արդյունքը: Մեր հավաքականին ընդամենը կես քայլ չբավարարեց ընտրական ենթախմբում երկրորդ հորիզոնականը զբաղեցնելու համար: Դրան խանգարեցին նաև սուբյեկտիվ գործոնները: Հիշենք Դուբլինում տեղի ունեցած՝ Իռլանդիայի հետ հայտնի հանդիպումը: Արդեն հաջորդ՝ 2014 թվականի աշխարհի առաջնության ընտրական փուլում Մինասյանի գլխավորած հավաքականը հնարավորություն ուներ ենթախմբում երկրորդ հորիզոնականը զբաղեցնելու և փլեյ-օֆֆում հայտնվելու, բայց կրկին ինչ-որ բան չհերիքեց: 5 տարի առաջ Մինասյանը կարող էր բացառիկ հաջողության հասնել նաև ակումբային ֆուտբոլի մակարդակում հայկական թիմին դուրս բերելով իր նշանակությամբ երկրորդ հեղինակավոր մրցաշարի խմբային փուլ:
Չցանկանալով ժամանակից շուտ խոսել փլեյ-օֆֆում մեր հնարավոր մասնակցության մասին՝ հարկ ենք համարում կրկին կարևորել «Սաբուրթալոյի» հետ դիմակայությունը: Երկու թիմերի խաղամակարդակը, ըստ էության, հավասար է, և առաջիկա երկու հանդիպումներում կարելի է կարևորել տակտիկական պայքարը: Հատկապես մարտավարական տեսանկյունից Վարդան Մինասյանը սովորաբար իր բարձրության վրա է լինում: Ուստի լիահույս ենք, որ առաջիկա հանդիպումներում «Արարատ-Արմենիային» կհաջողվի առավելության հասնել մրցակցի նկատմամբ: