Ֆուտբոլի Եվրոպա լիգայի խաղարկության որակավորման երրորդ փուլի առաջին խաղում վաղը Հայաստանի չեմպիոն «Արարատ-Արմենիան» «Հանրապետական» մարզադաշտում կմրցի Վրաստանի չեմպիոն «Սաբուրթալոյի» հետ:
Անկախությունից հետո սա կարելի է համարել հայ-վրացական ֆուտբոլային թերևս ամենակարևոր դիմակայությունը: Եվրագավաթների խաղարկությունում հայկական և վրացական թիմերը, առավել ևս՝ չեմպիոնները, նման հարթությունում երբևէ չեն հանդիպել: «Արարատ-Արմենիան» հայկական երրորդ ակումբն է, որին հաջողվել է դուրս գալ Եվրոպա լիգայի խաղարկության երրորդ փուլ: Անցյալ տարի նման արդյունք պատմության մեջ առաջին անգամ գրանցել էին «Փյունիկն» ու «Ալաշկերտը»: Հաղթանակի դեպքում «Արարատ-Արմենիան» կհայտնվի հեղինակավոր մրցաշարի փյել-օֆֆում ինչը նոր պատմական արդյունք կլինի հայկական ֆուտբոլի համար:
Ինչպես մեր չեմպիոնը, «Սաբուրթալոն» Եվրոպա լիգայում հայտնվել է Չեմպիոնների լիգայի խաղարկությունից: Այս մրցաշարի որակավորման երկրորդ փուլւմ վրացական թիմը զիջել էր Զագրեբի «Դինամոյին»: Առաջին խաղում, սեփական հարկի տակ 0:2 հաշվով պարտվելուց հետո, «Սաբուրթալոն» պատասխան խաղում հյուրընկալվելիս պարտություն էր կրել արդեն 3:0 հաշվով: Ի դեպ, Չեմպիոնների լիգայի խաղարկության առաջին փուլում «Սաբուրթալոն» պայքարից դուրս էր թողել Մոլդովայի չեմպիոն «Շերիֆին», որը բավական ուժեղ կազմ ունի: Հյուրընկալվելիս «Սաբուրթալոն» «Շերիֆին» հաղթել էր 3:0 հաշվով, իսկ սեփական հարկի տակ զիջել 1:3 հաշվով:
Նշենք նաև, որ, ի տարբերություն «Արարատ-Արմենիայի», «Սաբուրթալոյի» կորիզը կազմում են տեղացի երիտասարդ ֆուտբոլիստները: «Սաբուրթալոն» ունի ընդամենը 5 լեգեոներ: «Արարատ-Արմենիան» Չեմպիոնների լիգայի առաջին փուլում երկու հանդիպումների արդյունքում 4:3 հաշվով զիջել էր Շվեդիայի չեմպիոն ԱԻԿ-ին: Հայտնվելով Եվրոպա լիգայում՝ մեր թիմը երկու հանդիպումների արդյունքում 4:1 հաշվով առավելության էր հասել Ջիբրալթարի չեմպիոն «Լինկոլնի» նկատմամբ: Ի տարբերություն ԱԻԿ-ի հետ մրցավեճերի՝ վերջին երկու հանդիպումներում «Արարատ-Արմենիան» ցույց չտվեց այն ֆուտբոլը, որը սպասում էինք: Հուսանք, որ պատճառը կիսապրոֆեսիոնալ մակարդակի թիմին թերագնահատել էր, և որ առաջիկա դիմակայությունում «Արարատ-Արմենիան» գործի կդնի իր ողջ ներուժը:
Վաղվա խաղում բուքմեյքերները նախապատվությունը տվել են «Արարատ-Արմենիային»՝ վերջինիս հաղթանակի համար սահմանելով 2․1 գորածկից: Ոչ-ոքին գնահատված է 3․5, իսկ հյուրերի հաղթանակը՝ 3․7 գործակցով:
Հայ-վրացական ֆուտբոլային դիմակայությունները սովորաբար անցնում են լարված պայքարում: Կա մտավախություն, որ հատկապես Թբիլիսիում կայանալիք պատասխան հանդիպումը կուղեկցվի լարվածությամբ և հնարավոր բախումներով:
Նշենք, որ Հայաստանի և Վրաստանի ազգային հավաքականների միջև պաշտոնական հանդիպում դեռևս տեղի չի ունեցել: Շատ է խոսվում, որ վերջին տարիներին հարևան պետությունների ֆուտբոլի ֆեդերացիաները խուսափում են ազգային հավաքականների հետ ընկերական հանդիպումներ կազմակերպելուց՝ հնարավոր բախումներից խուսափելու համար: Չնայած որ երկու երկրների միջև բարեկամական հարաբերություններ են, այնուամենայնիվ, ֆուտբոլային դիմակայությունները տասնամյակներ շարունակ ավելի քան սկզբունքային են: Ինչևէ Հայաստանի ու Վրաստանի հավաքականների միջև տեղի է ունեցել 5 ընկերական հանդիպում, որից 3-ը ավարտվել է Վրաստանի հաղթանակով, մեկ մրցավեճում գրանցվել է ոչ-ոքի, և մեկ խաղում հաղթել ենք մենք:
Ի դեպ, Հայաստան-Վրաստան առաջին ընկերական հանդիպումը տեղի է ունեցել 1997 թվականի մարտի 30-ին Թբիլիսիում և ավարտվել է դաշտի տերերի հաղթանակով՝ 7:0 հաշվով: 2000 թվականի փետրվարին Կիպրոսում տեղի ունեցած միջազգային մրցաշարի շրջանակներում Հայաստանը Վրաստանին զիջել է 2:1 հաշվով, իսկ ապրիլին «Հրազդան» մարզադաշտում ոչ-ոքի՝ 0:0 խաղացել: 2004-ին Կիպրոսում Հայաստանը 2:0 հաշվով հաղթանակ է տարել, իսկ 2011-ին տեղի ունեցած վերջին խաղում զիջել 2:1 հաշվով: Եթե ազգային հավաքականների մակարդակով Երևանում և Թբիլիսիում տեղի ունեցած հանդիպումները հանդարտ են անցել, ապա վերջին տարիների ակումբային մակարդակով հայ-վրացական հակամարտությունն ուղեկցվել է տհաճ միջադեպերով: 2013 թվականին Թբիլիսիում «Շիրակի» և «Դինամոյի» միջև հանդիպումից հետո վրացի երկրպագուները հարձակվել էին հայ երկրպագուների վրա, շշեր նետել նրանց վրա: 2016 թվականին «Շիրակի» երկրպագուները հարձակման էին ենթարկվել արդեն Վրաստանի Գորի քաղաքում Եվրոպա լիգայի խաղարկության որակավորման առաջին փուլի «Դիլայի» հետ հանդիպումից առաջ: Վրացիները քարերով կոտրել էին գյումրեցի երկրպագուների մեքենաների ապակիները, գողացել էին դրոշներն ու շարֆերը, ոտնատակ արել դրանք: 2016 թվականին արդեն Երևանում Չեմպիոնների լիգայի խաղարկության որակավորման երկրորդ փուլում Թբիլիսիի «Դինամոյի» երկրպագուները «Հանրապետական» մարզադաշտում շշեր էին նետել արևելյան տրիբունայում նստած հայ երկրպագուների վրա: Նրանք փորձել էին կոտրել հյուսիսային տրիբունայի ճաղերը, ինչի հետևանքով էլ մի քանի երկրպագու վնասվածք էր ստացել:
Հուսանք, որ Երևանի և Թբիլիսիի միջև սպասվելիք ֆուտբոլային դիմակայությունը կանցնի հետաքրքիր, լարված, բայց միևնույն ժամանակ հանդարտ և փոխադարձ հարգանքի մթնոլորտում:
