ԱՄՆ Տեխաս նահանգի Էլ Պասո քաղաքի սուպերմարկետում կատարված ահաբեկչական հարձակման հետևանքով զոհվել է երեք երեխաների մայրը, որը մարմնով ծածկել է նորածնին, հաղորդում է ВВС-ն:
24-ամյա Ջորդան Անկոնդոն դպրոցական պարագաներ էր գնում իր մեծ երեխաների համար, երբ Walmart սուպերմարկետում կրակ են բացել այցելուների վրա: Մայրը ընկել է գետնին՝ մարմնով ծածկելով երկամսյա որդուն:
Ողբերգության ականատես է դարձել աղջկա 19-ամյա քույրը՝ Լետա Ջամրովսկին: Փոքրիկը բուժում է ստացել Էլ-Պասոյի համալսարանական բժշկական կենտրոնում. կոտրվել էին նրա երկու մատները: Նա արդեն դուրս է գրվել հիվանդանոցից և տատիկ-պապիկի մոտ է:
Աղջկա ամուսինը նույնպես զոհվել է կրակոցների ժամանակ. երբ աղջիկը շտապել է ծածկել երեխային, նա կանգնել է նրա և հրաձիգի միջև:
ԱՄՆ-ում օգոստոսի 3-ին AK-47 ավտոմատով զինված տղամարդը մտել է Էլ Պասո քաղաքի սուպերմարկետ և կրակ բացել. զոհվել է 20 մարդ:
Հաջորդ օրը ևս երկու ահաբեկչական հարձակում է տեղի ունեցել ԱՄՆ-ում: Օհայո նահանգում գտնվող Դեյթոն քաղաքում զոհվել է 10 մարդ, ևս 16-ը վիրավորվել են: Չիկագոյում անհայտ անձը կրակ է բացել մանկական խաղահրապարակի ուղղությամբ. 7 մարդ վիրավորվել է:
