«Առաջին լրատվական»-ի զրուցակիցը Արտակարգ եւ լիազոր դեսպան, Արցախի ԱԳ նախկին նախարար Արման Մելիքյանն է։
–Պարոն Մելիքյան, Արցախի նախագահական և խորհրդարանական ընտրություններին 8 ամիս է մնացել, նկատելի է, որ քաղաքական դաշտը ակտիվանում է, Արցախից հնչող հայտարարություններից նկատելի է, որ նաև որոշակի լարվածություն կա: Ինչպե՞ս եք գնահատում ընդհանուր իրավիճակը:
-Այն տպավորությունն ունեմ, որ Արցախում իրոք աճում է ներքաղաքական լարվածությունը և դա չի կարող չմտահոգել: Գտնում եմ, որ Արցախի պետական կառավարման համակարգի բոլոր մակարդակներում որոշակի լճացում կա, որը լուրջ խոչընդոտ է հանրապետության սոցիալ-տնտեսական զարգացման ճանապարհին, իսկ հակամարտության կարգավորման հարցում առկա բազմամյա տեղապտույտն ու քաղաքական անորոշությունը մյուս կողմից են բացասաբար ազդում հասարակության բարոյահոգեբանական վիճակի վրա:
-Արցախում սեպտեմբերին նաև ՏԻՄ ընտրություններ են սպասվում: Արդյո՞ք դա ևս չի նպաստում քաղաքական դաշտի ակտիվացմանը:
-Տեղական ինքնակառավարման մարմինների ընտրություններն այս անգամ կարող են ուժերի ստուգատես դառնալ հաջորդ տարի նախագահական ընտրապայքարին մասնակցելու հայտ ներկայացնող կուսակցությունների ու անհատների համար: Եթե ՏԻՄ ընտրություններում լուրջ խախտումներ արձանագրվեն, ապա, ամենայն հավանականությամբ, ներքաղաքական իրավիճակն Արցախում էլ ավելի կշիկանա Խորհրդարանական ու նախագահական ընտրություններին ընդառաջ: Վերը ասվածի համատեքստում կնախընտրեմ, որ Արցախում նախագահ դառնա մի այնպիսի գործիչ, որը երբևէ կապ չի ունեցել ֆինանսական մեքենայությունների ու ներքաղաքական զանազան խարդավանքների հետ, ունի ազնիվ, անկաշառ և քաղաքականապես հասուն, փորձված մարդու համբավ և զերծ է քաղաքական խնդիրներն ուժային լծակների գործադրմամբ լուծելու հակումներից: Նման մարդու ընտրվելը Արցախի նախագահի պաշտոնում կարող է լավագույն հեռանկարները բացել բոլորի համար:
–Մամուլում անընդհատ խոսվում է, որ Արցախում իրավիճակի լարվածության հարցում գործ ունենք արտաքին միջամտության հետ: Կիսում ե՞ք այդ տեսակետը:
-Միամտություն կլիներ արտաքին գործոնների ազդեցությունը բացառելը կամ անտեսելը: Մեր տարածաշրջանում բախվում են լրջագույն արտաքին շահեր, որոնք, ամենայն հավանականությամբ, իրենց սպասարկուներն ունեն այստեղ ամենուր, այդ թվում նաև Արցախում: Մենք պետք է հիշենք, որ եթե արտաքին առանձին դերակատարների համար խնդրի գինը գուցեև կարևոր է, բայց ոչ կենսական, ապա մենք մեր ու մեր սերունդների լինել-չլինելու հարց ենք լուծում և սխալվելու իրավունքը չունենք:
-Վարչապետ Նիկոլ Փաշինյանը հայտարարել է, թե օգոստոսի 5-ին Ստեփանակերտի Վերածննդի հրապարակում ելույթ է ունենալու։ Արդյո՞ք սա ուշացած քայլ չէ՝ հաշվի առնելով, որ տևական ժամանակ Արցախում, ըստ էության, եռացող ներքաղաքական ճգնաժամի՝ առերևույթ հանգիստ թվացող երևույթների խորքում, իրականում ընկած են բավական վտանգավոր հեռանկարներ։
-Ես կարծում եմ, որ պահը լավ է ընտրված, բայց թե ինչ արդյունք կունենանք՝ կախված կլինի վարչապետ Փաշինյանի խոսքի բովանդակությունից: Եթե այն չեղավ ծանրակշիռ, փաստարկված, հայկական պետականության ուժի հանդեպ վստահություն ներշնչող, ապա իրավիճակը կարող է էլ ավելի բարդանալ և ոչ միայն Արցախում:
