«Շատ ավելի հզոր, շատ ավելի ահռելի համակարգեր են քանդվել մշակույթի առաջ: Նույնիսկ Խորհրդային Միությունը՝ իր ահռելի համակարգով չէր կարողանում ազատ արվեստագետների, մշակույթի գործիչների հախից գալ՝ նույնիսկ գնդակահարություններով, բանտարկելով ու հոգեբուժարաններում փակելով: Հիմա մենք ունենք շատ ավելի թույլ դիմադրություն համակարգի կողմից, իսկ բախումներ միշտ պետք է լինեն, կլինեն փոքր պարտություններ, փոքր քայլեր առաջ կամ մեծ ցատկեր առաջ: Մենք, որպես մշակույթ ներկայացնողներ, պիտի պատրաստ լինենք ու գործենք՝ անկախ ամեն ինչից»,- «Առաջին լրատվական»-ի հետ զրույցում այս մասին ասաց «Լավ էլի» խմբի երգիչ, երգահան, կիթառահար Մհեր Մանուկյանը:
Ավելի քան մեկ տարի է անցել հեղափոխությունից, և այսօր հետհեղափոխական գերակա դիսկուրսը հին համակարգի և նոր իշխանության միջև է. վերջերս օրակարգ ներթափանցեց Ռ. Քոչարյանի հարցազրույցը, որտեղ մարտահրավեր է նետվում իշխանությանը, և այս առումով կանխատեսվում է թեժ աշուն: Անդրադառնալով այս դիտարկմանը՝ մեր զրուցակիցն ընդգծեց, որ իր կյանքի այս փուլում աշխատում է
չնայել քաղաքական ուժերի դասավորության տեսանկյունից, այլ շատ ավելի խորքային՝ մարդկային արժեքների, մղումների ու շարժիչ ուժերի տեսանկյունից: «Մենք՝ մեր հասարակությունը, եթե կարողանանք շատ ավելի մեծ տեղ տալ բարձր արժեքներին, արդյունքում ինչ քաղաքական իշխանություն էլ լինի, այս հասարակությունը շատ ավելի շահեկան դիրքերում կլինի: Այսօրվա Հայաստանի համար կարևորը ոչ թե քաղաքական կողմնորոշումն է, այս կամ այն իշխանության լինել-չլինելն է, այլ բարձր արժեքների իրականություն դառնալն է»,- ընդգծեց Մ. Մանուկյանը՝ հավելելով, որ յուրաքանչյուրն իր մեջ պետք է արժեքների հեղափոխություն իրականացնի:
Մանրամասն՝ տեսանյութում:
