«Մեկ տարի առաջ ունեինք հսկայական ներուժ, մեծ ոգևորություն, ես՝ ինքս, ցատկեցի-եկա Հայաստան, նույնիսկ բեմ բարձրացա, կարծում էի, որ վերջապես սպիտակ ձիու վրա եկավ այն ասպետը, որը մեզ պետք է փրկի: Եվ ես մենակ չէի իմ ոգևորության մեջ»,- այս մասին «Առաջին լրատվական»-ի հետ հետ զրույցում ասաց Օպերային երգչուհի, Հայաստանի ժողովրդական արտիստ Հասմիկ Պապյանը՝ հավելելով, որ, իհարկե, իրականությունն այլ է: Նրա խոսքով՝ այն սպասումները, որ կային, չեն իրականացել և չէին էլ կարող իրականանալ այդքան արագ. «Ամենակարևոր, մեծ քայլերը դեռ չեմ տեսնում, և դա է երևի իմ մտահոգության պատճառը: Կարծեք թե ետքայլ ենք անում»:
Երգչուհին նաև ընդգծեց, որ այնուամենայնիվ որոշել է վերադառնալ Հայաստան. «Հայաստանն ինձ համար կա և մնում է հայրենիք… Ես 30 տարի առաջ, գնալուց առաջ էլ գիտեի, որ մի օր իմ «գործուղումը» պիտի վերջանա և ես պիտի վերադառնամ Հայաստան: Ես ինձ երբևիցե չեմ պատկերացրել հիմնովին ապրել, ծերանալ դրսում: Ինձ թվում է յուրաքանչյուրն իր քայլը պետք է անի իր ասպարեզում և ինչ-որ քար դնի…»:
Անդրադառնալով դիտարկմանը, որ հասարակության մի ստվար հատված, թերևս, ավելի մեծ սպասելիքներ ուներ, քանի որ վերջապես համաժողովրդական աջակցություն ունեցող իշխանություն ունենք, սակայն դեռևս շարունակում ենք խոսել անցյալի, ոչ թե ապագայի մասին, և մեծ քայլերով առաջ գնալու փոխարեն առօրեական խնդիրներին լուծում տալով ենք զբաղված, Հասմիկ Պապյանը նշեց. «Չեմ կարող ասել, որն է պատճառը, բայց մի բան գիտեմ, որ հատկապես մեր ժողովուրդը սիրում է իր հայացքը դեպի վեր՝ դեպի երկրի առաջին դեմքին ուղղել և հետևել նրան, հատկապես հիմա, երբ մեր վարչապետն ընդունված է, ընտրված է և լեգիտիմ: Իմ սպասելիքները և պահանջները վարչապետից են, ինձ թվում է, որ միայն ինքը կարող է այս պահին պահանջներն արդարացնել. այդ պահանջները պետք է լինեն մեծ, լինեն մշակութային և կրեն հոգևոր արժեք:
Մանրամասն՝ տեսանյութում:
