Ալեքսանդր Թամանյանի անվան Ճարտապետության ազգային թանգարան-ինստիտուտի տնօրենի ժամանակավոր պաշտոնակատար Ռուբեն Արևշատյանը ֆեյսբուքյան գրառմամբ հայտարարել է, որ չի մասնակցելու Ճարտարապետության ազգային թանգարան-ինստիտուտի տնօրենի մրցույթին: «Առաջին լրատվական»-ի հետ զրույցում պարզաբանելով, թե որն է խնդիրը, ով կամ ինչն է խանգարում, Ռուբեն Արևշատյանը մանրամասնեց, որ մրցույթին չմասնակցելու վճիռը հանգուցալուծումն է խնդրների, որոնք առաջացել են երեք ամսվա ընթացքում թանգարանում ծավալված գործընթացների հետևանքով, որոնք փոխկապակցված են Քաղաքաշինության կոմիտեի նոր նախագահի նշանակման հետ:
«Ես միջազգային ասպարեզում ակտիվ աշատող, համադրող եմ: Երբ եկա թանգարան, Քաղաքաշինության կոմիտեի նախկին պետը թև ու թիկունք էր, խրախուսում էր փոփոխությունները: Թանգարանը բարդ օրգանիզմ է, ժամանակ է անհրաժեշտ, որ բոլոր հատվածների հետ ծանոթանաս: Ես կարողացա հասկանալ՝ ինչ խնդիրներ կան, այդ ընթացքում ցուցահանդեսային գործունեություն ծավալվեց… ժամանակ չունեի անդրադառնալ ասեկոսեներին:
Կոնֆլիկտն ունի խորքային բնույթ: Այն սկիզբ է առել երեք ամիս առաջ… Իրականացվող աուդիտը սթրեսային վիճակում էր պահում թանգարանը… Ես զարմացա, երբ լսեցի Մարկ Գրիգորյանի անունը, նրան ճանաչում եմ 40 տարի, որպես լրագրող, բայց երբևիցե մտքովս չէր անցնում, որ նա պետք է հայտնվի թանգարանային համադրողական գործունեության տիրույթում… Ինտրիգային վիճակը սրվում էր, վերջին կաթիլը լցվեց աուդիտի բացասական եզրահանգումից հետո: Աուդիտը հաջորդել է պարոն Վերմիշյանի հետ խոսակցությունից հետո. այստեղ միտում եմ տեսնում, ինձ փորձում էին հասկացնել, որ իմ կարիքը չունեն:
Մրցութային հանձնաժողովի անդամները Քաղաքաշինության կոմիտեի անձնակազմից են լինելու. ես այդ «թատրոնի» մասնակիցը չեմ ուզում լինել: Ես չեմ հանձնվել, չեմ ուզում, որ իմ քայլը դիտարկվի որպես զիջողականություն: Իմ որոշումը պրոտեստ է այն համակարգային իներցիոն զարգացումներին, որոնք շարունակվում են հետհեղափոխական Հայաստանում… Ակնհայտ է դառնում, որ պետական կառավարման համակարգը չի ենթարկվում փոփոխությունների»:
Մանրամասն՝ տեսանյութում: