Օրեր առաջ Հայաստանի սահմանին պայմանագրային զինծառայող զոհվեց, դրանից մեկ օր առաջ սահմանի նույն հատվածում մեկ այլ զինծառայող վիրավորվեց: Մինչ այսօր ՀԱՊԿ-ից, որի անդամ երկիր ենք նաև մենք, այս առնչությամբ որևէ արձագանք չի եղել: Խոսքը ռազմական միջամտության մասին չէ, այլ զուտ գնահատական տալու և առհասարակ նման գործողություններից զերծ մնալու կոչերի մասին է. ինչո՞ւ չենք լսում այդպիսի կոչեր: «Առաջին լրատվական»-ի այս հարցին ի պատասխան՝ քաղաքագետ Ստյոպա Սաֆարյանը ասաց. «Այդ կառույցը ստեղծված չէ Հայաստանի ռեգիոնալ մարտահրավերները հաղթահարելու համար: Հայաստանում փորձել են այդպես ներկայացնել, որ ՀԱՊԿ-ը ստեղծված է նրա համար, որ զսպի ադրբեջանաթյուրքական վտանգը: Մենք 2016-ով և դրանից առաջ ու դրանից հետո տեղի ունեցած մի շարք զարգացումներով համոզվել ենք, որ նման բան չկա»:
Շատերը կարծում են, որ եթե ՆԱՏՕ-ի երկրի նկատմամբ այդպիսի ոտնձգություն լիներ, ապա համապատասխան նիստ կգումարվեր, նիստի արդյունքում նաև համապատասխան հայտարարություն կարվեր, հետո ըստ անհրաժեշտության կորոշվեր՝ ինչ պետք է արվի. իսկ ի՞նչ պարտականություններ ունի ՀԱՊԿ-ը իր անդամ պետությունների նկատմամբ: Քաղաքագետ Ռոբերտ Ղևոնդյանը այս դիտարկման և հարցադրման կապակցությամբ նշեց, որ «իսկապես ՆԱՏՕ-ն և ՀԱՊԿ-ը այդ առումով համեմատելի չեն, քանի որ ՆԱՏՕ-ն կայացած ռազմաքաղաքական դաշինք է, որը ձգտում է պաշտպանել իր անդամ պետությունների շահերը, իսկ ՀԱՊԿ-ը, ինչպեսև Եվրասիական տնտեսական միությունը, քաղաքական կառույց է, որի հիմնական առանցքը Ռուսաստանն է: Մյուս պետությունների հետ երկկողմանի համաձայնագրերի հիման վրա է գործում կառույցը, որը չի կարող ենթադրել կողմերի շահերի բավարարում»:
Առավել մանրամասն՝ տեսանյութում։
