Հայկական բռնցքամարտի շուրջ կրքերն օր օրի ավելի են բորբոքվում: Հիշեցնենք, որ հունիսի 26-ին ՀԱՕԿ-ն իր կազմից հանեց Հայաստանի բռնցքամարտի ֆեդերացիային՝ վերջինիս փոխարեն Օլիմպիական կոմիտեի անդամ դարձնելով բռնցքամարտի ազգային ֆեդերացիային: Այս որոշումից ժամեր առաջ ՀՀ կրթության, գիտության, մշակույթի և սպորտի նախարարությունը հանդես էր եկել հայտարարությամբ՝ կոչ անելով ՀԱՕԿ-ին հարգել «Հասարակական կազմակերպությունների մասին» ՀՀ օրենքի պահանջները, զերծ մնալ խնդրահարույց նախաձեռնություններից ու չփորձել արհեստականորեն մի ֆեդերացիան փոխարինել մյուսով: Հայտարարության մեջ մասնավորապես նշված էր, որ ՀՀ ԿԳՄՍ նախարարությունը պատրաստակամ է աջակցել գործընթացին ու ՀԱՕԿ-ի հետ համատեղ նախապատրաստել Հայաստանի բռնցքամարտի հավաքական թիմին առաջիկա օլիմպիական խաղերին՝ մինչև ֆեդերացիայի շուրջ ծագած խնդրի հանգուցալուծումը, իսկ հանգուցալուծումը պետք է տրվի բազմակողմ քննարկումների արդյունքում:
Ասամբլեայից հետո ՀԱՕԿ-ի գլխավոր քարտուղար Հրաչյա Ռոստոմյանը, ԿԳՄՍ-ն անվանելով երկար անունով նախարարություն, հայտարարել էր, որ իրենց չի հուզում նույնիսկ այն, որ պետությունը հնարավոր է չֆինանսավորի Բռնցքամարտի ազգային ֆեդերացիային, որը միջազգային կառույցների և մասնավորապես ԱԻԲԱ-ի կողմից պաշտոնապես ճանաչված չէ: Հիշեցնենք, որ ՀԱՕԿ-ը գլխավորել է Գագիկ Ծառուկյանը, որը վերջին շրջանում լարված հարաբերությունների մեջ է Հայաստանի բռնցքամարտի ֆեդերացիայի նախագահ Արթուր Գևորգյանի հետ: Նշենք նաև, որ բռնցքամարտի ազգային ֆեդերացիան ստեղծվել է հենց Ծառուկյանի հովանու ներքո:
Ուշադրություն չդարձնելով ՀՀ կրթության, գիտության, մշակույթի և սպորտի նախարարության հորդորին՝ ՀԲՖ-ի փոխարեն ՀԱՕԿ-ի կազմ ընդգրկելով իր ջանքերով ստեղծված ֆեդերացիային, Ծառուկյանը հայկական բռնցքամարտի շուրջ ստեղծված կոնֆլիկտը այլ հարթություն տեղափոխելուց զատ, ըստ էության ձեռնոց նետեց պետությանը:
Ի պատասխան Ռոստոմյանի հայտարարության՝ ԿԳՄՍ սպորտի գծով փոխնախարար Գևորգ Լոռեցյանը Armtimes.com-ին տված հարցազրույցում մասնավորապես ասել էր. «Պարոն Ռոստոմյանին խորհուրդ կտամ, որպեսզի նախևառաջ հարգի պետական ապարատը, հարգի Հայաստանի Հանրապետությունը: Եվ եթե մինչև այսօր չի հասցրել ծանոթանալ ՀՀ-ում սպորտի պետական քաղաքականությունը վարող նախարարության անվանը ու գործառույթներին, ապա խորհուրդ կտամ շատ արագ դա անել: Երկար անունով նախարարություն չէ, կա նախարարության հստակ անվանում, որը վարում է հստակ քաղաքականություն: Իսկ երկար անունով հասարակական կազմակերպությանը խորհուրդ կտամ չփորձել պղտոր ջրում ձուկ բռնել, նաև չփորձել նմանատիպ զարտուղի ճանապարհներով ազդեցություն ունենալ սպորտում վարվող քաղաքականության վրա: Բռնցքամարտում տարիներ շարունակ գործունեություն ծավալած ֆեդերացիային գրչի մեկ հարվածով դուրս թողնելն անթույլատրելի է, անկախ նրանից՝ ղեկավար կազմը պատշաճ կատարե՞լ է իր պարտականությունները, թե՞ ոչ: Եթե ոչ, ապա դրա լուծման համար կան օրինական հստակ ճանապարհներ, որոնք մատնանշված են ՀԿ-ների մասին օրենքով: Ղեկավար կազմի թերացման մասին կարող են բարձրաձայնել տվյալ ՀԿ-ի անդամները, որոնք ունեն բոլոր կանոնադրական, օրենսդրական լիազորությունները: Մեզ համար առնվազն անհասկանալի էր պարոն Ռոստոմյանի՝ նման հարցն այսպիսի հապշտապ ձևով լուծելու միտումը»:
Փաստորեն, եթե ամիսներ առաջ հայկական բռնցքամարտում լարված իրավիճակի հիմքում Գագիկ Ծառուկյանի և Արթուր Գևորգյանի հարաբերություններն էին, ապա այսօր կոնֆլիկտի 3-րդ կողմում պետությունն է՝ ի դեմս ԿԳՄՍ-ի: ՀԱՕԿ-ն իր վերջին որոշումներում ակնհայտ կերպով ցույց տվեց, որ չի պատրաստվում հաշվի առնել ԿԳՄՍ-ի օրինական պահանջները և անելու է այն, ինչ ուզում է և ճիշտ է համարում:
Իրավիճակն իսկապես անառողջ է և հղի ծանր հետևանքներով: Ակնհայտ է թերևս մի բան. Հայաստանի բռնցքամարտի ֆեդերացիայի հեռացումը ՀԱՕԿ-ի կազմից հերթական ծանր հարվածն էր սիրված մարզաձևին: Օլիմպիական խաղերին մեկ տարուց քիչ ժամանակ է մնացել, իսկ մենք ունենք միանգամայն պառակտված բռնցքամարտ: Կարծում ենք՝ ժամանակն է, որ ՀՀ իշխանությունները ոչ թե միջամտեն խնդրին, այլև հստակ քայլեր կատարեն այն կարգավորելու նպատակով: Վերջապես հասկանալ է պետք, որ այս ամենից առաջին հերթին տուժում են մեր բռնցքամարտիկները, որոնք ներկայացնում են երկիր, և որոնց հետ երկրպագուները հույսեր են կապում: