«Նպաստների համակարգի փոփոխությունը ելնում է այն սկզբունքից, որ հնարավոր լինի ստեղծել կայուն եկամտի աղբյուրներ և այդ աջակցությունը վերածել իրական աջակցության, այսինքն՝ մարդկանց հնարավորություն տալ իրոք հաղթահարել այդ դժվարին իրավիճակը, ոչ թե տարիներ շարունակ ստանալ աջակցություն, բայց ըստ էության պահպանել նույն կենսամակարդակը»,- «Առաջին լրատվական»-ի հետ զրույցում նշեց աշխատանքի և սոցիալական հարցերի նախարարի տեղակալ Ժաննա Անդրեասյանը՝ հստակեցնելով, որ այս դեպքում խոսքը աշխատունակ մարդկանց աջակցելու մասին է:
Նրա խոսքով՝ նպաստների համակարգում ձևավորվել է ընտանիքների քիչ թե շատ կայուն մի խումբ, որը տարիներով մնում է նպաստի համակարգում, սակայն նրանց կենսամակարդակը և կյանքի որակը չեն փոխվում. «Չի փոխվում այն պատճառով, որ այս համակարգը որևէ կերպ չի խրախուսում ակտիվությունը, և մենք փորձելու ենք շատ ավելի մոտիվացնող գործոններ դնել այս համակարգի հիմքում. պետք է իրականացնենք կարիքների ամբողջական գնահատում՝ հասկանալու համար, թե որն է մարդու խնդիրը»:
Փոխնախարարը ընդգծեց, որ այս մարդկանց պետք է տրվի և՛ հոգեբանական, և՛ մասնագիտական կողմնորոշման աջակցություն. «Հնարավոր է անհրաժեշտություն առաջանա հավելյալ ծրագրերի ուսուցման համար, որպեսզի մարդն ունենա որոշակի որակավորում, և նաև՝ զբաղվածության մասով աջակցություն»:
Հարցազրույցն ամբողջությամբ՝ տեսանյութում: