Եվրոպա լիգայի խաղարկության որակավորման երկրորդ փուլի առաջին խաղում Հայաստանի չեմպիոն «Արարատ-Արմենիան» սեփական հարկի տակ 2:0 հաշվով առավելության հասավ Ջիբրալթարի չեմպիոն «Լինկոլնի» նկատմամբ: Այո, մեր թիմը լուրջ նախադրյալ ստեղծեց Եվրոպա լիգայի որակավորման երրորդ փուլ դուրս գալու, բայց…
«Արարատ-Արմենիան» հանդես եկավ սպասվածից խիստ անհաջող: Երկրորդ կեսի սկզբում մեր մրցակիցը մնաց 10 ֆուտբոլիստներով, և թվում էր, թե «Արարատ-Արմենիայի» խոշոր հաշվով հաղթանակն անխուսափելի է: Հանդիպման ընթացքում դաշտի տերերը 21 հարված են կատարել դեպի մրցակցի դարպասը, որոնցից միայն 4-ն է եղել դարպասի ուղղությամբ: Սա մտահոգիչ վիճակագրություն է, ինչը խոսում է հարձակման օղակի ոչ այնքան արդյունավետ լինելու մասին: Եվ սա այն դեպքում, երբ մրցակիցը կիսասիրողական մակարդակի թիմ էր: Որպեսզի թիմերի որակի տարբերության կոնտրաստն ավելի պատկերավոր լինի, նշենք, որ «Լինկոլնի» կազմում խաղում են ընդամենը 9 ֆուտբոլիստներ, որոնք ունեն տրանսֆերային արժեք, այսինքն՝ պրոֆեսիոնալ խաղացողներ են: Նրանց ընդհանուր տրանսֆերային արժեքը կազմում է 675 հազար եվրո, մինչդեռ «Արարատ-Արմենիայի» խաղացողներից միայն Զակարիա Սանոկոյի տրանսֆերային արժեքը կես միլիոն եվրո է:
Չեմպիոնների լիգայի խաղարկության որակավորման առաջին փուլում «Արարատ-Արմենիան» շատ ավելի լավ տպավորություն թողեց Շվեդիայի չեմպիոնի դեմ մրցավեճում: Կարելի է ասել, որ մեր չեմպիոնը մոտ էր զորեղ մրցակցի արգելքը հաղթահարելուն: «Կարող էինք և պարտավոր էինք ավելի խոշոր հաշվով հաղթել: Բայց չիրացրեցինք մեր ունեցած գոլային պահերը: Եվ ես դա կապում եմ ոչ թե վարպետության, այլ ուշադրության պակասի հետ: Հակառակորդ թիմն ավելի շատ էր պաշտպանվում: Եվ մեզ համար դա սպասելի էր: Պաշտպանվելն ավելի հեշտ է, քան հարձակվելը»,- խաղից հետո ասել է «Արարատ-Արմենիայի» գլխավոր մարզիչ Վարդան Մինասյանը:
Վերջինիս խոսքով՝ խաղի ելքի վրա իր ազդեցությունն ունեցավ տոթ եղանակը: «Երկրորդ կեսում մենք սկսեցինք կիսատ գործել՝ կիսատ փոխանցումներ, կիսատ պաշտպանություն: Դրա համար էլ գուցե արժանի չէինք երրորդ կամ չորրորդ գոլին»,- ասաց նա:
Վարդան Մինասյանը ըստ էության ներկայացրել է երեկվա հանդիպման օբյեկտիվ պատկերը: ԱԻԿ-ի դեմ հանդիպումներում Մինասյանի ֆուտբոլիստները տակտիկապես գրագետ գործեցին: Երևանյան խաղում հենց ճիշտ մարտավարական գործողությունների շնորհիվ հաղթեցինք:
Ինչևէ, որքան էլ որ զարմանալի է, «Լինկոլնի» գլխավոր մարզիչ Վիկտոր Աֆոնսոն կրած պարտությունը կապում է մրցավարի հետ: «Իմ կարծիքով՝ այս խաղում մրցավարն ավելի վստահ պետք է գործեր, մենք մի շարք հարցերում համաձայն չենք նրա հետ: Երբ մնում ես տասը ֆուտբոլիստով, ապա սկսում ես ավելի շատ պաշտպանվել: Մենք դեռ մեկ հանդիպում ևս ունենք, և ամեն ինչ դեռ որոշված չէ»,- ասել է Ջիբրալթարի չեմպիոնի գլխավոր մարզիչը:
Վստահ ենք, որ եթե դաշտի տերերը երեկ հաղթեին խոշոր հաշվով, Աֆոնսոն չէր համարձակվի նման հայտարարություն անել: Ավելի ստույգ՝ մեր չեմպիոնի ոչ դժգույն խաղը թույլ է տվել, որ կիսասիրողական թիմի մարզիչը պարտությունը կապի այլ գործոնների հետ:
Կարծում ենք, որ «Արարատ-Արմենիայի» անհամեմատ ավելի թույլ խաղը ևս մեկ պատճառ ունի: Հայաստանի չեմպիոնն ուղղակի թերագնահատեց մրցակցին՝ վստահ լինելով, որ հեշտ հաղթանակ է տանելու: Պատասխան հանդիպումից առաջ վստահաբար կարելի է ասել, որ «Արարատ-Արմենիայի»՝ Եվրոպա լիգայի խաղարկության որակավորման երրորդ փուլ դուրս գալու հնարավորությունը բավական մեծ է:
Իսկ այս փուլում մեզ սպասում է անհամեմատ ավելի ուժեղ մրցակից: Ամենայն հավանականությամբ, երրորդ փուլում «Արարատ-Արմենիան» կմրցի Վրաստանի չեմպիոն «Սաբուրթալոյի» հետ: Վերջինս Չեմպիոնների լիգայի խաղարկության որակավորման առաջին փուլի առաջին խաղում երեկ սեփական հարկի տակ 0:2 հաշվով զիջել է Զագրեբի «Դինամոյին»: Կասկածից վեր է, որ խորվաթական թիմն արդեն իսկ վճռել է դիմակայության ելքը: Նշենք, որ չնայած պարտության՝ «Սաբուրթալոն» հարձակողական և դինամիկ ֆուտբոլ ցուցադրեց: Սա խոսում է այն մասին, որ հայ-վրացական սպասվող դիմակայությունը թեժ է լինելու: Հայ վրացական ֆուտբոլային դիմակայությունները, որպես կանոն, լարված են լինում: Սպասվող դիմակայությունը առանձնանում է նրանով, որ միմյանց հետ մրցելու են երկու երկրների չեմպիոնները Եվրոպա լիգայի խաղարկության որակավորման երրորդ փուլում:
Նշենք, որ մեր թիմերից ոչ մեկին երբևէ չի հաջողվել հաղթահարել եվրագավաթների մրցաշարերի որակավորման երրորդ փուլը: «Արարատ-Արմենիան» ունի բացառիկ հնարավորություն պատմական արդյունք գրանցելու: «Լինկոլնի» հետ պատասխան հանդիպումը պետք է լինի նախապատրաստական և ստուգողական մրցավեճ կարևորագույն դիմակայությունից առաջ:
«Լինկոլն»-«Արարատ-Արմենիա» հանդիպումը տեղի է ունենալու հուլիսի 30-ին, Ջիբրալթարում:
