Մոտ մեկ ամիս առաջ Իտալիայում տեղի ունեցած ըմբշամարտի Եվրոպայի պատանիների առաջնությունում Հայաստանի հունահռոմեական ոճի հավաքականը նվաճել էր 4 մեդալ: Մասնավորապես, 80 քաշային Վիգեն Նազարյանը դարձել էր արծաթե մեդալակիր, իսկ 45 քաշային Հոմերոս Առաքելյանը, 48 քաշային Կարապետ Մանվելյանը և 51 քաշային Արմեն Հարությունյանն արժանացել էին բրոնզե մեդալի: Հայաստանի թիմի կազմում Եվրոպայի պատանեկան առաջնությանը մասնակցել են նաև Վարուժան Անտոնյանը (55 կգ), Աշոտ Խաչատրյանը (60 կգ), Արման Խաչիկյանը (65 կգ), Լյովա Խաչատրյանը (71 կգ), Ռազմիկ Մահլումյանը (92 կգ) և Ռազմիկ Քուրդյանը (110 կգ), որոնք մեդալ չեն նվաճել:
Իտալիայում տեղի ունեցած առաջնությունը մեզ համար նշանավորվել էր հատկապես Վիգեն Նազարյանի հաջողությամբ: Վերջինս առաջին անգամ էր ելույթ ունենում Եվրոպայի առաջնությանը և առաջին փորձից բավական բարձր արդյունք գրանցեց: Նազարյանը մեր ամենատաղանդավոր ըմբիշներից մեկն է, որի հետ մասնագետներն ու երկրպագուները մեծ հույսեր են կապում: Նշենք, որ Եվրոպայի առաջնությանը մասնակցել են 2002-2003 թթ. ծնված ըմբիշները: Նազարյանը ծնվել է 2003 թվականին, և Իտալիայում նա գոտեմարտել է մեկ տարով ավելի մեծ մրցակիցների հետ:
Մեկնարկային գոտեմարտում Նազարյանը 9:0 հաշվով առավելության էր հասել հույն մրցակցի նկատմամբ, իսկ երկրորդ գոտեմարտում նույն հաշվով առավելության հասել արդեն դանիացի ըմբիշի նկատմամբ: Կիսաեզրափակչում Նազարյանին մրցակից էր հասել Թուրքիան ներկայացնող Ումուտ Չելեմը: Լարված և դիտարժան պայքարում մեր մարզիկն առավելության էր հասել 2:1 հաշվով:
Այս գոտեմարտը կարելի է բեկումնային համարել հայ ըմբիշի կարիերայի համար: Մասնավորապես, հենց այս հաղթանակի շնորհիվ Նազարյանը իր և մեր երկրի համար նվաճեց արծաթե մեդալը:
«Առաջին անգամ էի մասնակցում նման մակարդակի մրցաշարի, և լարվածությունը բավական մեծ էր: Վստահ հաղթանակներից հետո կիսաեզրափակիչ գոտեմարտը բավական դժվար էր: Երբ գիտակցում ես, որ այդ մարտից է կախված քո երկրի համար մեդալ նվաճելը, պատասխանատվության զգացումն էլ ավելի է մեծանում: Կիսաեզրափակչում տարած հաղթանակն ամենակարևորն էր իմ կարիերայում, որը նաև մեդալ պարգևեց կարևոր մրցաշարում»,- «Առաջին լրատվական»-ի հետ զրույցում ասաց Նազարյանը:
Եզրափակիչ գոտեմարտում Նազարյանը մրցել էր ռումինացի Դանիել Կոջոկի հետ և զիջել 3:0 հաշվով: «Չեմ կարող ասել, որ մրցակիցն ավելի ուժեղ էր, բայց նա տակտիկական առումով ավելի ճիշտ մարտ տարավ և նվաճեց չեմպիոնի տիտղոսը: Եվրոպայի առաջնությունից հետո շատերը ոգևորվեցին իմ նվաճած մեդալով՝ դա համարելով մեծ նվաճում: Շատերը մոտենում էին և գոհունակություն հայտնում իմ ցույց տված արդյունքի համար: Նշեմ, սակայն, որ ես դժգոհ եմ իմ ելույթից: Եվրոպայի առաջնությունում եզրափակիչ հասնելն ու պարտվելը ցավալի է: Ես կարող էի նաև ոսկե մեդալ նվաճել, բայց ինչ-որ բան չստացվեց: Կարծում եմ՝ առաջիկայում կհաջողվի ավելի բարձր արդյունքներ գրանցել»,- նշեց Նազարյանը:
Արդեն հուլիսի 31-ին Հայաստանի հավաքականը մեկնելու է Բուլղարիայի մայրաքաղաք Սոֆիա, որտեղ օգոստոսի 2-4-ը տեղի կունենա աշխարհի առաջնությունը: Առաջին անգամ մասնակցելով աշխարհի առաջնությանը՝ Վիգեն Նազարյանը խնդիր է դրել նվաճել ոսկե մեդալ: «Անլուծելի խնդիրներ չկան, և ամեն ինչ անելու եմ ոսկե մեդալ նվաճելու համար: Մենք ունենք ուժեղ հավաքական և ակնկալում ենք, որ այս անգամ էլ գոնե 3-4 մեդալ կնվաճենք: Չի բացառվում, որ Սոֆիայում ևս հանդիպեմ Կոջոկի և թուրք ըմբիշի հետ: Նրանք իմ հիմնական մրցակիցների շարքում են: Տեղյակ եմ նաև, որ Ռուսաստանը աշխարհի առաջնությանը ներկայանալու է իր ուժեղագույն ըմբիշներով: Եվրոպայի առաջնությունում իմ քաշային կարգում Ռուսաստանը ներկայացրեց ներքին առաջնության փոխչեմպիոնը, իսկ այս անգամ արդեն հանդես կգա չեմպիոնը: Ընդհանուր առմամբ առաջիկա առաջնությունն իր կազմով շատ ավելի ուժեղ է լինելու: Բարձրակարգ ըմբիշներ ունեն Իրանը, Չինաստանը, Ճապոնիան: Ամեն դեպքում ես պատրաստ եմ և պայքարելու եմ աշխարհի չեմպիոնի կոչման համար»,- հավելեց Նազարյանը:
Աշխարհի առաջնությունում Հայաստանը ներկայացնելու են 10 ըմբիշներ: Այսինքն՝ բոլոր քաշային կարգերում մեր երկիրը կունենա ներկայացուցիչներ: Նախապատրաստական փուլում Հայաստանի հավաքականն արդեն անցկացրել է ուսումնամարզական հավաք: Եվս մեկ հավաք մեր հավաքականը կանցկացնի առաջիկա օրերին՝ Օլիմպավանում:
Նշենք, որ Նազարյանը մարզվում է Նորայր Մուշեղյանի անվան ըմբշամարտի օլիմպիական մարզադպրոցում: Նրա մարզիչը Տիգրան Սահակյանն է: Ի դեպ, Վիգեն Նազարյանը Սահակյանի առաջին սանն է, ում հաջողվել է Եվրոպայի առաջնությունում մեդալ նվաճել: Հայաստանի պատանեկան հավաքականը ելույթ է ունենում Գագիկ Խաչատրյանի գլխավորությամբ:
