Անդրադառնալով պատմաբան Ռաֆայել Համբարձումյանի տարածած հորդորակին, որով նա կոչ է անում նոյեմբերի 22-ը հայտարարել Հայրենատիրության համահայկական տոն եւ նշել Հայաստանում եւ աշխարհի բոլոր հայաշատ երկրներում, հրապարակախոս, պատմաբան Հրանտ Տեր-Աբրահամյանը նշեց. «Ես կարծում եմ, որ հայրենատիրությունը ոչ թե խոսքերով պետք է հայտարարվի եւ նշվի մեկ օր, այլ դա կարող է լինել այն օրը, երբ Հայաստանը բավականաչափ ռեսուրս ունենա` վերադարձնելու իր կորսված հայրենիքը: Իսկ այսօր այդ հարցը արծարծելու համար մենք չունենք ռեսուրսներ, եւ ես դրա իմաստը չեմ տեսնում: Մենք այսօր ունենք Հայրենիք` Հայաստանի Հանրապետությունը, որի մասին պետք է հոգալ: Ես չեմ կարծում, որ իմաստ ունի կորսված հայրենիքի մասին խոսել` հղում անելով Վուդրո Վիլսոնին, երբ դու չես կարող այն վերադարձնել: Հայրենիքը Վուդրո Վիլսոնի կամ Օբամայի գծած սահմաններով չի որոշվում: Իսկ որպեսզի այդ կորսված հայրենիքը հնարավոր լինի վերադարձնել, դրա համար կան շատ պարզ մեխանիզմներ. պետք է խոսել ու պայքարել Հայաստանում, անօրինականությունների, բացասական երեւույթների դեմ, ձգտել` դառնալու նորմալ, ժողովրդավարական երկիր, այլ` ոչ թե խոսել հայրենատիրության մասին: Դա է իրական հայրենատիրությունը»: