Անդրադառնալով այն լուրերին, թե Լոռվա մարզպետ Արամ Քոչարյանին ազատել են աշխատանքից, թերթը գրում է.
«Ավելի ուշ տեղեկություն ստացանք, որ նա արձակուրդի դիմում է գրել, սակայն մեզանում հարկադիր արձակուրդները, որպես կանոն, նախորդում են պաշտոնաթողություններին: Մեզ պատմեցին, որ տևական ժամանակ է՝ վարչապետ Տիգրան Սարգսյանը դժգոհություններ ուներ Արամ Քոչարյանից, սակայն համբերության բաժակը լցվել է այն ժամանակ, երբ մարզպետը, մեղմ ասած, թյուրիմացության մեջ է գցել իր անմիջական ղեկավարին:
Ասում են՝ մարզպետը մեկնել է Վրաստան, բայց վարչապետին ասել է, թե մեկնում է Սանկտ Պետերբուրգ՝ ինչ-որ գործերով։ Տեղեկանալով, որ իրեն խաբել են, Տիգրան Սարգսյանը մտել է Սերժ Սարգսյանի մոտ և պահանջել՝ կամ ես, կամ Քոչարյանը։ Եվ քանի որ մարզպետը մեղավոր է եղել, ուլտիմատումը դեր է խաղացել, և նախագահը որոշել է բավարարել վարչապետի պահանջը»։
«Ի դեպ, մեկ այլ մարզպետի հարցն էլ է տևական ժամանակ քննարկվում՝ Սյունիքի մարզպետի, սակայն, մեր տեղեկություններով, Սերժ Սարգսյանը որոշել է նրան հանել Աժ ընտրություններից հետո: Մինչ այդ Լիսկան անելիք ունի»,- հավելում է «Հրապարակ»-ը: