«Ապօրինի ծառահատումների դեմ պայքարում դրական կարևոր փոփոխություններից մեկն արվեց անցյալ շաբաթ, երբ հստակ հայտարարվեց, որ այլևս ապօրինի կոմպրոմիսներ չեն լինելու, այսինքն՝ այն, ինչ գրված է թղթի վրա, պետք է լինի իրականություն. այլևս չենք ունենալու երկու իրականություններ, երբ կյանքում անում ենք այլ բաներ, իսկ թղթի վրա գրում ենք ցանկություններ, որոնք հետո չենք իրագործում »,- «Առաջին լրատվական»-ի հետ զրույցում նշեց շրջակա միջավայրի նախարարի տեղակալ Վարդան Մելիքյանը:
Նրա խոսքով՝ ապօրինի ծառահատումների խնդիրը վերջին տարիներին չէ, որ ի հայտ է եկել. «Անկախության տարիներից՝ էներգետիկ ճգնաժամից սկսած, մենք այդ խնդիրը միշտ ունեցել ենք: Ցավոք սրտի, անտառամերձ շրջաններում մարդիկ այլ կերպ չեն պատկերացնում իրենց ջեռուցման խնդիրների լուծումը, քան անտառից, շատ դեպքերում՝ անվճար, փայտ վերցնելն է: Բանը հասել է այնտեղ, որ մարդիկ փայտն օգտագործում են ոչ միայն իրենց ջեռուցման խնդիրը լուծելու համար, այլև ամռանը՝ սուրճ եփելու: Եթե այսպես շարունակվի, մենք կկորցնենք անտառը»:
Խոսելով այլընտրանքային միջոցների մասին՝ փոխնախարարը հիշատակեց արևային էներգիայի օգտագործումը և կենսավառելիքը՝ հավելելով, որ խոսքը աթարի մասին չէ:
Իջևանի դեպքերի վերաբերյալ մեր զրուցակիցը նշեց, որ իրավապահների աշխատանքը պետք է լինի շարունակական. «Կան լուրեր, որ այս իրադարձությունների հետևում կան խոշոր կազմակերպիչներ, որոնք փայտը էժան գներով գնելով գյուղացիներից՝ հետո շատ ավելի թանկ վերավաճառում են Երևանում կամ Արմավիրի, Արարատի մարզերում: Սրանք էին, որ շատ ագրեսիվ կերպով փորձում էին հակազդել այն քայլերին, որոնք իրականացվում էին կառավարության կողմից»:
Հարցազրույցն ամբողջությամբ՝ տեսանյութում:
