Ռոբերտ Քոչարյանի պաշտպանական թիմի ներկայացուցիչները հայտարարել են, որ ՄԻԵԴ-ից և Վենետիկի հանձնաժողովից Ռոբերտ Քոչարյանի վերաբերյալ խորհրդատվական կարծիքները կարող են ստացվել մինչև 5-6 ամիս ժամանակահատվածում: Խոսքը Սահմանադրական դատարանի դիմումի մասին է, որով այդ կառույցներից ակնկալվում է խորհրդատվական կարծիք երկրորդ նախագահի դատական գործի վերաբերյալ՝ անձեռնմխելի՞ է նա, թե՞ ոչ:
Ինչպես հայտնի է, ՍԴ-ն այդ գործը ընդունել էր վարույթ և նշանակել նույնիսկ քննության օր՝ օգոստոսի 20: Գործի քննության ընթացակարգ էր ընդունվել գրավոր տարբերակը: Դրանից հետո եղավ վարչապետ Նիկոլ Փաշինյանի հայտնի հարցազրույցը, որտեղ նա փաստացի վերահաստատեց Սահմանադրական դատարանի կազմի կամ առնվազն նախագահի փոփոխության քաղաքական մտադրությունը: Այդ հարցազրույցին էլ հանկարծ հաջորդեց ՍԴ որոշումը՝ գործն ուղարկել Վենետիկ և ՄԻԵԴ՝ փորձաքննության և խորհրդատվական կարծիքի:
Ռոբերտ Քոչարյանի պաշտպանական թիմի հայտարարությունից փաստացի ստացվում է, որ Հրայր Թովմասյանը նրա գործը, այսպես ասած, «սառեցրել» է 5-6 ամսով՝ ուղարկելով այն հեռավոր խորհրդատվության հետևից: Այսինքն՝ ստացվում է, որ վարչապետի կոշտ հարցազրույցից հետո թեև Հրայր Թովմասյանն, այսպես ասած, պատասխան հարցազրույց տվեց՝ ոչ պակաս կոշտ, ընդունելով մարտահրավերը, այդուհանդերձ մինչ այդ հարցազրույց-պատասխանը նա վարչապետի հարցազրույցից հետո կատարեց մի քայլ, որը պարունակում է Ռոբերտ Քոչարյանի գործը մի քանի ամիս սառեցնելու ներուժ:
Մեծ հաշվով ստացվում է, որ Հրայր Թովմասյանն այդ քայլով ժամանակ է շահում գործնականում բոլոր կողմերի համար՝ բացառությամբ գուցե միայն երկրորդ նախագահ Քոչարյանի: Նրա պաշտպաններն իհարկե հայտարարում են, որ գործը այդ ընթացակարգում գտնվելու պարագայում երկրորդ նախագահը պետք է լինի ազատության մեջ, սակայն հազիվ թե կա դրա տեսանելի իրականանալիությունը, քանի որ, համենայնդեպս մոտ ապագայում, նրան ազատ արձակելը այլևս բավականին ուժգին հարված կհասցնի իշխանության հեղինակությանը, որը հենց Քոչարյանի վերաբերյալ դատավճռի առիթով կառուցեց քաղաքական գործողությունը դատական համակարգի դեմ, և մինչ այդ գործողության որևէ հանգուցալուծում երկրորդ նախագահի ազատ արձակումը կնշանակի, որ իշխանության այդ քաղաքական գործողությունը տապալվել է: Ըստ այդմ՝ անկասկած է, որ կառավարող քաղաքական թիմը կանի ամեն ինչ, որպեսզի թույլ չտա այդ տապալումը:
Մյուս կողմից՝ օգոստոսի 20-ին նշանակված ՍԴ-ում Ռոբերտ Քոչարյանի գործի քննարկումը որոշակի ցայտնոտ կարող էր ստեղծել, որի ռիսկը, սակայն, Հրայր Թովմասյանը փաստորեն չեզոքացրեց՝ գործը ուղարկելով Վենետիկ: Ժամանակը այս իրավիճակում գործնականում բոլորին է պետք՝ բացի թերևս Ռոբերտ Քոչարյանից: