Ռուսաստանում կարծես թե ավելի ու ավելի է ուրվագծվում Պուտինի իշխանության վերադարձը, կամ թերևս Պուտին անձի վերադարձը իշխանության, այսինքն` նախագահի պաշտոնին, որովհետև Պուտինի իշխանությունը, մեղմ ասած, չի էլ հեռացել: «Սելիգեր» ամառային ճամբարի երիտասարդների հետ հանդիպմանը ներկայիս նախագահ Մեդվեդևը հայտարարել էր, թե ինքը իր նախագահական երկրորդ ժամկետի հարցում կկողմնորոշվի Պուտինի հետ քննարկումների արդյունքում, քանի որ ինքը չի ցանկանում մրցակցել Պուտինի հետ:
Այսինքն` Մեդվեդևն այդպիսով խոստովանում է, որ Պուտինի որոշման վրա ինքը ազդեցություն չունի և մնում է միայն պարզել` դնո՞ւմ է Պուտինը թեկնածությունը, թե՞ ոչ: Այս ամենը հետաքրքրական է նրանով, թե ինչ պրոյեկտում կարող է ունենալ Հայաստանի ներքաղաքական կյանքում: Իսկ այստեղ բավական հետաքրքրական քայլի է դիմում «Բարգավաճ Հայաստան» կուսակցությունը, որի նորընծա անդամ Վահան Բաբայանը, որը մի քանի կուսակցության երիտասարդական թև փոխելով, Երիտասարդական կուսակցություն փոխելով` վերջապես հանգրվանեց ԲՀԿ-ում, նախաձեռնել է Պուտինին Հայաստան հրավիրելու գործընթաց, որպեսզի վերջինս մասնակցի օգոստոսին այստեղ կայանալիք ԱՊՀ-ի երիտասարդների հավաքին, որն, ի դեպ, անցկացվում է ԲՀԿ նախագահ Գագիկ Ծառուկյանի հովանու ներքո:
Այսինքն` ըստ էության կարելի է ասել, որ Ծառուկյանը իր կուսակցության երիտասարդ անդամի միջոցով, իհարկե ոչ ԲՀԿ անունից, այլ այսպես կոչված` «Հայաստանի երիտասարդական կառավարության» անունից Պուտինին հրավիրում է Հայաստան: Միամիտ պետք է լինել սույն քայլի իրականում ոչ այնքան երիտասարդական, որքան քաղաքական ենթատեքստը չհասկանալու համար: Եթե Պուտինն ընդունի հրավերը և գա, ապա կասկած չկա, որ սա լուրջ վերադասավորումներ կարող է առաջ բերել Հայաստանի իշխանական թևում, որտեղ «Բարգավաճ Հայաստանը» ներկայումս կարծես թե, այսպես ասած, խորթ զավակի դերում է հայտնվել:
Պուտինի միջոցով ԲՀԿ-ն երևի թե ակնկալում է Հայաստանի իշխանական բուրգում ամրացնել իր դիրքերը` քաջ գիտակցելով, թե այդ բուրգում ի՞նչ նշանակություն ունի ռուսական ազդեցությունը: Ասել կուզի` իշխանական բուրգում ըստ էության արդեն իրար վրա են «դրսից տղա» բերում, ինչը վկայում է, թե փոխադարձ անվստահության և դժգոհության ինչ մեծ լիցքեր են կուտակվել ոչ միայն զուտ ՀՀԿ շարքերում, այլ կոալիցիայում ընդհանրապես: Թեև Հայաստանի իշխանական բուրգի պարագայում Ռուսաստանից «բերված տղան» դժվար թե համարվի «դրսից» բերված: Այն ավելի շուտ կլինի «վերից բերված» տղա: Այստեղ, սակայն, դաշտը կարող է քիչ ավելի լայն լինել և ներգրավել նաև Ռոբերտ Քոչարյանին: Անկախ այն բանից, թե ներկայումս Քոչարյանն ինչքան կապ ունի ԲՀԿ հետ, Պուտինի հետ նրա կապը կարծես թե ակնառու է, և եթե Պուտինը գա Հայաստան, ապա երևի թե անկասկած է, որ Ռոբերտ Քոչարյանը կփորձի դա օգտագործել գուցե որպես իր քաղաքական վերակենդանացման վերջին շանս:
