ԱՄՆ պետքարտուղար Մայք Պոմպեոն Թուրքիայի արտգործնախարար Մևլութ Չավուշօղլուի հետ հեռախոսազրույցի ժամանակ հայտարարել է, որ Վաշինգտոնը հիասթափված է Անկարայի գործարքից՝ կապված ռուսական С-400 զենիթահրթիռային համալիրների գնման հեոտ: Այս մասին հաղորդում է RIA Novosti-ն՝ վկայակոչելով Պետդեպարտամենտի պաշտոնական ներկայացուցիչ Մորգան Օրթագուսի հայտարարությունը:
«Պետքարտուղարը խոր հիասթափություն է հայտնել, որ Թուրքիան ձեռք է բերել ռուսական С-400 զենիթահրթիռային համալիրներ»,- ասվում է հայտարարության մեջ:
Ավելի վաղ ԱՄՆ-ը հաղորդել է նորագույն ամերիկյան F-35 ինքնաթիռի ստեղծման ծրագրից Թուրքիային բացառելու մասին՝ С-400-ի գործարքի պատճառով:
Թուրքիայի ազգային պաշտպանության նախարար Հուլուսի Աքարն էլ հայտարարել է, որ դա կթուլացնի ՆԱՏՕ-ին:
ԱՄՆ-ը և ՆԱՏՕ-ի երկրները մտավախություն ունեն, որ եթե Անկարայում հայտնվեն և՛ С-400, և՛ F-35, ապա ռուսական համակարգի ռադարները կկարողանան հայտնաբերել և հետևել այդ ինքնաթիռներին:
