Ճապոնացի ավիաուղևորները պարզվում է՝ ավելի քիչ շփվող են, քան այլ երկրների բնակիչները: Հարցվածների միայն 15%-ն է խոստովանել, որ կարող է ինքնաթիռում զրույցի բռնվել անծանոթների հետ: Դա բացատրվում է երկրի մշակութային առանձնահատկություններով. ճապոնացիները անհատական տարածության նկատմամբ հարգանքից և քաղաքավարությունից դրդված՝ պատրաստ չեն ավելորդ անգամ անհանգստացնել ճանապարհի իրենց հարևաններին:
Այսպիսի եզրակացության է հանգել Expedia ընկերությունը՝ հարցման ենթարկելով ավելի քան 18 հազար ճանապարհորդների աշխարհի 23 երկրներից:
Ճապոնացիները նախընտրում են տեղ զբաղեցնել անցման մոտ, ոչ թե լուսանցույցի: Հարցվածների 79%-ը այդպես է վարվում, որպեսզի հեշտ լինի զուգարան գնալը: Եթե նրանց տեղը չի լինում անցման մոտ, ապա 48%-ը կձգտի շատ զգույշ անցնել՝ չարթնացնելու համար հարևանին, իսկ 20%-ը կսպասի՝ մինչև նա արթնանա:
Անծանոթների հետ զրույցի բռնվելու նկատմամբ քիչ հակվածություն ունեն նաև Հոնկոնգի (24%), Գերմանիայի (26%), Ավստրալիայի (27%) և Հարավային Կորեայի (28%) բնակիչները: Ամենաշատախոսը եղել են Հնդկաստանից (60%), Մեքսիկայից (59%), Բրազիլիայից (51%) հարցվածները: Միաժամանակ ավստրալացիները ամենից շատ են պատրաստակամ օգնելու հարևանին բեռը դարակում դնելու հարցում (50%): Իսկ հնդկացիները ամենայն հավանականությամբ կտան ինչ-որ խորհուրդներ անծանոթներին (38%): Ճապոնիայից հարցվածների շարքում այդպիսիք կազմում են միայն 3%: