Բարձրագույն դատական խորհրդի հուլիսի 20-ին կայացած նիստում ԲԴԽ անդամները ԲԴԽ նախագահ են ընտրել Երևանի ընդհանուր իրավասության դատարանի նախագահ Ռուբեն Վարդազարյանին։ Հաջորդ կարևոր և ուշագրավ իրադարձությունը Նախշուն Տավարացյանի հրաժարականն էր.« Հիմք ընդունելով ստեղծված իրավիճակը, հաշվի առնելով ԲԴԽ-ի՝ որպես երկրի իրավական անվտանգությունն ապահովող սահմանադրական մարմնի ողջամիտ կամ մտացածին ենթադրություններով ստվերելու անթույլատրելիությունը, կարևորելով Խորհրդում աշխատանքները համերաշխության ու վստահության մթնոլորտում իրականացնելու անհրաժեշտությունը, հրաժարական եմ տալիս՝ որպես Բարձրագույն դատական խորհրդի անդամ և գտնում, որ իմ գործունեությունը շարունակելով որպես Վճռաբեկ դատարանի դատավոր էլ ավելի կբարձրացնեմ դատական իշխանությանը հեղինակությունն ու արդարադատության արդյունավետությունը», – իր դիմումում, մասնավորապես, գրել է Տավարացյանը:
Նախկին դատավոր Պարգև Օհանյանը «Առաջին լրատվական»-ի հետ զրույցում հույս հայտնեց, որ տեղի ունեցած փոփոխությունները կնպաստեն դատական համակարգի առողջացմանը։ Միևնույն ժամանակ Օհանյանն ասաց.«Գուշակություններ չանենք, բայց լավատես լինենք։Որքան էլ փորձենք տարանջատել, բայց ամեն ինչ կախված է նաև քաղաքական կամքից։ Թեև ես մտավախություն ունեմ, որ ինչ-որ տեղ դատական իշխանության անկախությունը հաստատուն չի լինելու, հեղհեղուկ է լինելու։ Քանի դեռ կա սպառնալիք ԲԴԽ-ի կողմից վեթինգի ենթարկվելու, ԲԴԽ-ի կողմից կարգապահական տույժի ենթարկվելու, բնականաբար դատավորներն իրենց անկախ չեն զգա։ Հիմա եթե քաղաքական իշխանության համար դա ընդունելի է, այսինքն այն տեսանկյունից, որ դա կզգաստացնի դատավորներին՝ հուսանք լավ կլինի։ Բայց դատավորների լիարժեք անկախության մասին դեռ երկար ժամանակ չպետք է խոսենք»։
Օհանյանի դիտարկմամբ՝ եթե ելնում ենք այն կանխավարկածից, որ ԲԴԽ-ն դատական իշխանության անկախության երաշխավորն է, ապա պետք է հաշվի առնենք, որ այն նաև կարգապահական պատասխանատվության ենթարկողն է՝ ընդհուպ մինչև լիազորությունների դադարեցում, առայժմ դե ֆակտո, հետո գուցե նաև դե յուրե վեթինգի ենթարկողը.«Բայց ինչպե՞ս կլինի, անկախության երաշխավորը հենց ինքը կոչված կամ լիազորված է կարգապահական պատասխանատվության ենթարկել՝ ընդ որում օրենքի խախտումով, որովհետև այս պահի դրությամբ դատական վեթինգը սահմանադրությանը հակասող նորմեր ունի, որոնց հիման վրա ԲԴԽ-ն իրավունք ունի դատավորին իր կայացրած, օրինակ միջանկյալ դատական ակտի համար, ենթարկվի պատասխանատվության»։
Ինչ վերաբերում է կոնկրետ Նախշուն Տավարացյանի շուրջ ծավալված իրադարձություններին, Պարգև Օհանյանն ասաց.«Ես այդ մասին չէի ցանկանա խոսել, ընդամենը կասեմ՝ դա մեղմ ասած պատիվ չի բերում ո՛չ մեր երկրին, ո՛չ ԲԴԽ-ին և առհասարակ ոչ մեկին։ Դա պարզապես ամոթ էր, անցավ գնաց, կանգ չառնենք դրա վրա։ Կարծես այնտեղ պակաս տեղ կա՝ գիտնականի, հուսանք մի չեզոք անձ կընտրվի, որը պրոֆեսիոնալ կլինի ու կնպաստի դրական փոփոխություններին։Եթե բարեխիղճ, ազնիվ մոտեցում լինի՝ ԲԴԽ-ի գոնե մեծամասնության կողմից լավ կլինի։ Ես խոսում եմ խոցելի կողմերի մասին, որը դատավորների անկախությանը երաշխիք չի ապահովի, բայց եթե խղճով լինեն՝ ոչ միայն լիազորություններ չդադարեցնեն, կարգապահական պատասխանատվության չկանչեն՝ լավ կլինի»։