Հայաստանի տնտեսությունը բավականին խոցելի է, և եթե դիտարկում ենք մակրոտնտեսական ցուցանիշները, գեոքաղաքական իրավիճակը, իհարկե, հայկական տնտեսությունը չի կարող համարվել շատ ավելի լավը, քան մենք կանք: Այսօր լրագրողների հետ հանդիպման ժամանակ նման կարծիք հայտնեց «Ամերիա» բանկի զարգացման գծով տնօրեն Տիգրան Ջրբաշյանը՝ «Առաջին լրատվականի» խնդրանքով մեկնաբանելով «Ֆորբս» ամսագրի վատագույն տնտեսությունների ցուցակի 2-րդ տեղում Հայաստանի հայտնվելը:
«Մեր տնտեսությունը բնորոշվել է ոչ թե այս պահին, այլ ցույց է տրվել նրա խոցելիությունը, սակայն այդ գնահատականը բնորոշ էր այն շրջանին: 2006 թ.-ին ՀԲ-ն հրապարակել էր «Կովկասյան վագր» գիրք: «Կովկասյան վագրից» մինչև «Ֆորբս»-ի վատագույն 10 տնտեսություններ՝ այն թռիչքն է, որ ժամանակակից տնտեսագիտական միտքը կատարում է ՀՀ վերաբերյալ: Չի կարող տնտեսությունը 4 տարիների ընթացքում այդպես փոխվել»,- ասաց Տ.Ջրբաշյանը՝ հավելելով, որ այսօր ընդհանրապես տնտեսագիտական միտքը գտնվում է որոշակի փնտրտուքների մեջ, փորձում է հասկանալ՝ ինչ է նշանակում մրցակցային առավելություն, տնտեսական քաղաքականություն:
Անդրադառնալով մեր այն հարցին, թե որքանո՞վ է իրատեսական ԿԲ նախանշած 6.5% տարեկան սղաճը, Տ.Ջրբաշյանը նշեց, որ ամառվա վերջին միանիշ սղաճ ենք ունենալու. «Կարծում եմ՝ դրանից մի քիչ ավելի կլինի՝ մոտ 7%: Ոչ մոտիկ 10%-ին, բայց չի լինելու նաև 5%-ի մոտ:
Գյուղատնտեսության իրեն վատ ու լավ պահելը շատ կարևոր է, բայց մեր գնաճի հիմնական մասը ներմուծված է՝ միջազգային գներն էին: Ներկայում և՛ սննդամթերքի, և՛ նավթամթերքի միջազգային գները կայունացման միտում ունեն, ինչը վկայում է, որ սղաճի այդքան մեծ վտանգ ներմուծման տեսակետից չկա:
Ըստ բանախոսի՝ միաժամանակ շատ կարևոր է, որ բավական լուրջ աճ է արձանագրվել փոխանցումների (տրանսֆերտների) մասով՝ 2011 թ. հունվար-հունիսին, 2010 թ. նույն ժամանակաշրջանի համեմատ, 30%, ինչը նույնպես որոշակի իմաստով մեղմացնում է արտարժութային շուկայում առկա ճնշումները:
ՀՆԱ-ն, Տ. Ջրբաշյանի համաձայն, կանխատեսված 4.5%-ից ավելի կլինի և կտատանվի 5-5.2%-ի սահմաններում: