Լուրեր
Մի քանի հոգու դժգոհությունը չի նշանակում, որ խաղաղապահ ջոկատ էր պետք թատրոն մտցնել

Ռուսական դրամատիկական թատրոնը նոր տնօրեն ունի: ՀՀ կրթության, գիտության, մշակույթի և սպորտի նախարարությունը Երևանի Ստանիսլավսկու անվան ռուսական դրամատիկական թատրոնի տնօրենի ժամանակավոր պաշտոնակատար է նշանակել «Արմմոնո» միջազգային թատերական փառատոնի տնօրեն, Սունդուկյանի անվան ազգային ակադեմիական թատրոնի նախկին դերասանուհի Մարիաննա Մխիթարյանին։ Մինչ այդ թատրոնի տնօրենի ժամանակավոր պաշտոնակատար էր նշանակվել դերասան Յուրի Իգիթխանյանը:

«Առաջին լրատվական»-ի հետ զրույցում անդրադառնալով թատրոնի շուրջ ստեղծված իրավիճակին և առաջացած խնդիրներին`դերասան Յուրի Իգիթխանյանը նշեց. «Անհասկանալի է՝ ինչ է կատարվում, չեմ ուզում, որ դա դառնա մի մեծ պատմություն: Չեմ հասկանում մոտիվացիան. ինչո՞ւ էր պետք լարել կոլեկտիվը և թատրոնը գցել շոկային վիճակի մեջ:

Նախարարությունում ինձ հավատացնում էին, որ մեր կոլեկտիվում ինչ-որ խնդիրներ կան, և Մարիաննա Մխիթարյանը եկել է, որ այդ խնդիրները հանդարտեցնի: Կոլեկտիվը մեկ ամսով գնում է արձակուրդ, ո՞ւմ պետք է հանդարտեցնի:

Ինձ ասացին, որ կոլեկտիվը նամակ է գրել նախարարություն, որտեղ գրված է, որ թատրոնում ամեն ինչ նորմալ է, տնօրեն-գեղարվեստական տանդեմը հրաշալի աշխատում է: Դրանից հետո ուրիշ պատմություն է սկսվել, և այդ նամակը համարել են պարտադրանքով և վախեցնելով գրված նամակ: Ես կատակով ասում եմ՝ երևի էլեկտրաշոկով եմ վախեցրել:

Հիմա մրցույթ է լինելու թատրոնի տնօրենի պաշտոնի համար: Թատրոնի աշխատակիցների 90 տոկոսը հետաքրքրված է, զանգում են և սատարում՝ «դուխը» չկորցնեք, և ասում, որ ուզում են, որ ես լինեմ տնօրեն: Միանշանակ ես կմասնակցեմ մրցույթին: Չեմ հրաժարվելու իմ վեցամսյա աշխատանքի արդյունքից, իմ ծրագրերից: Թատրոնը մի օրգանիզմ է, որը մեկ-երկու տարվա մեջ «արյունը» կփոխվի, խաղացանկում նոր ներկայացումներ կհայտնվեն»:

 

Մանրամասն՝ տեսանյութում:

  • Դիտումներ՝ *