Վարչապետ Նիլոլ Փաշինյանը երեկ «Ազատություն» ռադիոկայանին տված հարցազրույցում անդրադարձ կատարեց Սահմանադրական դատարանի շուրջ ստեղծված իրավիճակին և Վահե Գրիգորյանի նամակի բովանդակությանը: Թեմայի շուրջ «Առաջին լրատվական»-ի հետ քննարկմանը մասնակցեցին «Իմ քայլը» խմբակցության պատգամավոր Արման Բոշյանը և վերլուծաբան Նժդեհ Հովսեփյանը:
Արման Բոշյանն անդրադառնալով հարցին, թե արդյոք վարչապետը սպառիչ պատասխան տվեց այն հարցերին, որոնք հանրային հնչեղություն են վայելում և արագ լուծում են պահանջում, նշեց. «Վարչապետի՝ դատաիրավական համակարգի հետ կապված հարցազրույցն այն քաղաքական կամքի վերահաստատումն էր, որն այսօր կառավարող քաղաքական ուժն ունի: Ինձ համար այդ փաստի արձանագրումն էր կարևորը: Ինչ վերաբերում է ՍԴ-ում ստեղծված իրավիճակին, վարչապետը մանրամասնորեն նկարագրեց այն մեծ քաղաքական առևտուրը, որը տեղի է ունեցել, և կարծում եմ, որ այս հարցազրույցից հետո շատ հանգամանքներ պարզ դարձան»:
Վարչապետն իր հարցազրույցում նաև արձանագրեց, որ Սահմանադրական դատարանը Հայաստանի Հանրապետությունում ամենավարկաբեկված ինստիտուտներից մեկն էր. «Սահմանադրական դատարանը ի վերջո վավերացրել է՝ 96 թվից սկսած՝ բոլոր ընտրակեղծիքները և ըստ էության՝ կա վստահության ճգնաժամ նաև Սահմանադրական դատարանի նկատմամբ…»:
Վստահության ճգնաժամ կա, իսկ իրավական և քաղաքական հարթություններում կա՞ ճգնաժամ. ի պատասխան այս հարցի՝ Նժդեհ Հովսեփյանը նշեց. «Վստահության ֆենոմենն ինքնին իրավաքաղաքական կատեգորիա է, հատկապես եթե խոսքը պետության իշխանությունների երեք ճյուղերի մասին է: «Իրավական ճգնաժամ կա, որովհետև Հրայր Թովմասյանը ՍԴ դատավոր է ընտրվել է իրավական լուրջ բացթողումներով, լեգալության խնդիր կա… Կա նաև ՍԴ անդամ – ՍԴ դատավոր խնդիրը, քանի որ նրանք բոլորովին այլ գործառույթներ են իրականացնում: Քաղաքական ճգնաժամ նույնպես միանշանակ կա: ՍԴ-ն կաղապարված է նախկին օրենասդրական կարգավորումներով…»:
Մանրամասն՝ տեսանյութում: