Իշխանությունը «փրկում» է Ռոբերտ Քոչարյանին. ով է սրա համար պատասխան տվողը

«…Ձեր ապիկարությունը սահմաններ չունի, ձեր պորտաբուծության պատճառով երկրի ղեկավարի՝ վարչապետի խոսքը, խոստումը, հանձնառությունն եք նսեմացրել, ոտքի տակ տվել։ Այս բոլորի արդյունքում Հայաստանի ժողովրդի հավաքական կամքով բանտում հայտնված ոճրագործի շուրջ զարգացումները միջազգային ատյաններում և կազմակերպություններում Հայաստանի ապագայի համար վտանգավոր ելքեր կարող են ապահովել։ Սա՝ որպես զգուշացում»,- իշխանության թիմին օրեր առաջ ահազանգել էր ԱԺ պատգամավոր Արման Բաբաջանյանը։

Ռոբերտ Քոչարյանի ու մյուսների գործը քննող դատավոր Դավիթ Գրիգորյանի աշխատասենյակի խուզարկության շուրջ զարգացող իրադարձությունները մտահոգություններ են ծնում, որ պատգամավորի կանխատեսումները ճիշտ էին։

Դատավոր Դավիթ Գրիգորյանի իրավունքների խախտման վերաբերյալ փաստաբան Գեորգի Մելիքյանը դիմել է Բարձրագույն դատական խորհուրդ, ինչպես նաև հանցագործության մասին հաղորդում է ներկայացրել Ոստիկանություն։ «Դատավորի իրավունքների էական խախտման, ինչպես նաև նրա անկախությունը ոտնահարելու դեպքերում ԲԴԽ-ն է միջնորդությամբ հանդես գալիս Գլխավոր դատախազին։ Ինչ վերաբերում է Ոստիկանությանը ներկայացրած հաղորդմանը, դա կապված է խուզարկության և առգրավման ընթացքում քննիչի կողմից թույլ տրված ապօրինությունների հետ»,- ասել է նա։

Փաստաբան Գեորգի Մելիքյանի խոսքով՝ դատավոր Դավիթ Գրիգորյանի աշխատասենյակը կնիքվել է մինչև դատարանի կողմից խուզարկության թույլտվության որոշում ստանալը. «Այսինքն՝ կնքվել է, հետո միայն դատարանից որոշում է ստացվել, ինչն էլ ապօրինի է։ Հարցին՝ արդյոք եղե՞լ են առգրավումներ այն քրեական գործի նյութերից, որի շրջանակում կատարվում էր խուզարկությունը, փաստաբանը բացասական պատասխան է տվել. «Դա եղել է ընդամենը պատրվակ, դրա շրջանակում որևէ բան չի առգրավվել, խուզարկությամբ թիրախավորված՝ կոնկրետ այդ գործով առգրավել են այն ամենը, ինչը որ վերաբերելի է եղել Քոչարյանի գործին»։

Ամենևին, բնավ էլ չենք պնդում, թե Դավիթ Գրիգորյանը հրեշտակ է, դեռ ավելին՝ համոզված ենք, որ նա Հայաստանում հաստատված կոռումպացված դատական համակարգի ներկայացուցիչներից մեկն է, որը բազմաթիվ առիթներով կարող էր նսեմացրած լինել Հայաստանի շատ քաղաքացիների իրավունքներ, սակայն սա ամենևին էլ չի արդարացնում այն ապաշնորհ գործողությունները, որ կատարում են իրավապահ մարմինները՝ պարզապես «արջի ծառայություն» մատուցելով քաղաքական իշխանությանը, Նիկոլ Փաշինյանին։

Եթե ճիշտ են փաստաբանի պնդումները, ապա շատ շուտով Հայաստանի իշխանությունները միջազգային հեղինակավոր կառույցներից կստանան հերթական ապտակը կամ «դեղին քարտը», այս անգամ՝ Ռոբերտ Քոչարյանի գործով, ինչը շատ ավելի ծանր հարված կլինի, քան Վենետիկի հանձնաժողովի սկանդալային արձանագրությունը։

Ստեղծված իրավիճակի համար Նիկոլ Փաշինյանը պետք է մեղադրի միայն ու միայն իրեն ու իր մերձավոր շրջապատին, որովհետև քաղաքականության մեջ հակացուցված է այսքան ապաշնորհ լինելը, հաջորդաբար սխալներ կրկնելը, որն արդեն նմանվում է քաղաքական անմեղսունակության։

Ի՞նչ է նշանակում մեկ տարուց ավելի դատական ռեֆորմ չանելը ու դրա հետևանքով նախկին համակարգի ապամոնտաժմանն ուղղված կարևորագույն գործերի դատաքննության վիժեցման վտանգներ ստեղծելը։ Ի՞նչ արժեին ՀՔԾ բացահայտումները, եթե դրանք հայտնվելու էին քրեաօլիգարխիկ համակարգի հետ պորտալարով կապված դատական համակարգում։ Հետին թվով Նիկոլ Փաշինյանի թիմը հուսահատ քայլերով փորձեց շտկել իրավիճակը՝ հաջորդաբար գործելով նոր սխալներ, ինչի հետևանքով միջազգային կառույցներում էապես տուժելու է Հայաստանի հեղինակությունը։

Ո՞ր հանճարը Նիկոլ Փաշինյանին խորհուրդ տվեց վեթինգի ու անցումային արդարադատության մասին խոսել միայն այն բանից հետո, երբ դատարանը փոխեց Ռոբերտ Քոչարյանի խափանման միջոցը։ Կամ՝ ո՞ր երկրում է բարեփոխման մասին հայտարարվում դատարանների մուտքերի շրջափակման համատեքստում։

Այսքանից հետո կարելի՞ է զարմանալ Վենետիկի արձագանքի վրա։

Հիմա էլ համընդհանուր կարծիք կարող է ձևավորվել, որ իշխանությունները վեթինգի ու անցումային արդարադատության մասին մոռացել են, կամ այդ գաղափարները սրբագրված են, որովհետև դարձյալ ճաղերի հետևում է Ռոբերտ Քոչարյանը։ Համենայնդեպս, իր վերջին բացառիկ հարցազրույցում Նիկոլ Փաշինյանը հնարավորինս «խմբագրեց» վեթինգը, իսկ անցումային արդարադատության մասին անգամ խոսք չասաց, ինչը ենթադրում է, որ իշխանությունները, գոնե առաջին փուլում, ձախողել են դատական ռեֆորմը։ Հակառակ պարագայում նման կասկածելի գործողություններով չէր թիրախավորվի մի դատավոր, որը քննում է Քոչարյանի գործը։

Այնպիսի տպավորություն է, որ իշխանության ներսում գտնվող մի անտեսանելի ձեռք հետևողականորեն «արդարացնում» է Ռոբերտ Քոչարյանին՝ նրա առաջ բարենպաստ դռներ բացելով եվրոպական դատական ատյաններում։ Ամեն ինչ այսքան տխուր չէր լինի, եթե խոսքը չվերաբերեր Մարտի 1-ի գործին, որի որակյալ բացահայտումը՝ բովանդակային ու ընթացակարգային առումներով, պետք է լիներ այս իշխանության պատվի հարցը։

Լուսանկարը՝ Armeniasputnik-ի