«Ազատություն» ռադիոկայանին տված հարցազրույցում վարչապետ Նիկոլ Փաշինյանը հարցերի լայն շրջանակի անդրադարձավ և մի քանի կարևոր շեշտադրումներ արեց: Թեմայի շուրջ «Առաջին լրատվական»- ի հետ քննարկմանը մասնակցեցին կառավարման փորձագետ Սերոբ Անտինյանը, քաղաքագետ Արմեն Վարդանյանը և վերլուծաբան Մհեր Ղալեչյանը:
Վարչապետի կարծիքով՝ իրկառավարման ընթացքում ամենամեծ ձեռքբերումը ժողովրդավարությունն է և Հայաստանի ժողովրդավարական իմիջը, և այն, որ ժամանակակից աշխարհում Հայաստանը անառարկելիորեն համարվում է ժողովրդավարական երկիր:
Անդրադառնալով այս դիտարկմանը՝ Ա. Վարդանյանը նշեց, որ իշխանությունների ամենամեծ ձեռքբերումն իսկապես եղել է լուրջ քայլեր կատարելը դեպի ժողովրդավարություն. «Բայց ասել, որ Հայաստանը վերջնականապես արդեն իսկ դարձել է ժողովրդավարական երկիր, սխալ մոտեցում է. Հայաստանը դեռևս համարվում է մասնակիորեն ազատ երկիր: Հայաստանում 1991-ից ի վեր առաջին անգամ 2018 թվականին Հայաստանում տեղի ունեցան ժողովրդավարական ընտրություններ, որոնց արդյունքները չվիճարկվեցին: Բայց քանի դեռ չունենք կայացած պետական ինստիտուտներ, ժողովրդավարության հաղթանակի մասին խոսելը դեռևս վաղաժամ է»:
Ս. Անտինյանը հավելեց, որ ժողովրդավարությունը բացարձակ արժեք է, և հեղափոխության ամենամեծ ձեռքբերումը ժողովրդավարությունն է, մասնավորապես այս իշխանությունների լեգիտիմությունը շատ կարևոր բազիս է, որի վրա պետք է կայանա մյուս ինստիտուտների կայացումը»:
Մհեր Ղալեչյանը նկատեց, որ ժողովրդավարությունը մարդկանց մտայնության մեջ իսկական իմաստով դեռևս չի արմատավորվել, շատերը ժողովրդավարությունը շփոթում են ամենաթողության հետ:
Վարչապետը հանրապետությունում վատ կառավարման քննադատությունների վերաբերյալ նշել է, որ դա 98 տոկոսով պայմանավորված է համակարգային գործոնով, քանի որ նոր կադրերի 2 տոկոսն է փոխարինվել նորերով: «Եվ հիմա, երբ որ փորձում ես աշխատել օրենքով, պարզվում է, որ այդ օրենքը աշխատելու համար չէ, այդ օրենքը ցույց տալու համար է: Աշխատելու հիմնական մեթոդը եղել է կոռուպցիան»:
Ս. Անտինյանի խոսքով՝ անհրաժեշտ է կայացնել ճիշտ կառավարչական որոշումներ, ճիշտ ուղղությամբ ընթացքի համար որոշումներ կայացնել, որի արդյունքում կունենանք արդյունավետ կառավարում: «Ճիշտ կառավարչական որոշումները կարող են լավացնել մեր կյանքը»:
Քննարկման մասնակիցներն անդրադարձան նաև վարչապետի հետևյալ արձանագրմանը. «Չմոռանանք, որ Սահմանադրական դատարանը ի վերջո Ձեզ հայտնի հանգամանքների բերումով Հայաստանի Հանրապետությունում ամենավարկաբեկված ինստիտուտներից մեկն էր, որովհետև էդ Սահմանադրական դատարանը ի վերջո վավերացրել է՝ 96 թվից սկսած, բոլոր ընտրակեղծիքները և ըստ էության՝ կա վստահության ճգնաժամ նաև Սահմանադրական դատարանի նկատմամբ…»:
Քննարկման մասնակիցների կարծիքով՝ վարչապետը կարևոր քայլ կատարեց, բայց իշխանությունը դանդաղում է և որոշ հարցերում անադեկվատ է գործում:
Մանրամասն՝ տեսանյութում: