2016 թվականի այս օրը՝ հուլիսի 17-ին, «Սասնա ծռերը» գրավել էր ՊՊԾ գունդը: Այն զավթելու և այլ արարքների համար մեղադրվում է 32 անձ: Խմբի անդամներից ներկայումս միայն կալանքի տակ են ոստիկանների սպանությունների կատարման համար մեղադրվող Արմեն Բիլյանն ու Սմբատ Բարսեղյանը:
Այս առնչությամբ «Հանրապետություն» կուսակցության քաղխորհրդի անդամ, փաստաբան Հովիկ Արսենյանն ասաց, որ «Սասնա ծռերի» ընդվզումը այդ ժամանակվա քաղաքական իշխանության դեմ առաջինը չէր. «Մարդիկ հանգել էին այն համոզման, որ այլ եղանակով իշխանության փոփոխություն հնարավոր չէ, և այդ ճանապարհը ընտրեցին: Նրանք չէին նախատեսել, որ կարող է և զոհեր լինեն, չնայած պարտավոր էին նախատեսել»:
Նրա խոսքով՝ «Սասնա ծռերը» հայրենասեր մարդիկ են, մեր պետության ու հասարակության համար միշտ պայքարած և չեն խնայել իրենց կյանքը սահմանին. «Սակայն անկանխատեսելի սպանությունները փաստի առաջ կանգնեցրին այդ մարդկանց: Եվ պատահական չէ, որ այդ հետևանքից ելնելով՝ մեծ ալիք չառաջացրեց հասարակության մեջ և չմիացան այդ, այսպես կոչված, շարժմանը. սաղմը մնաց իր տեղում»:
Հովիկ Արսենյանը, հարցը դիտարկելով հասարակական գիտակցության տեսանկյունից, ասաց. «Դանակը ոսկորին էր հասել, և պետք է քայլեր կատարվեին ճիշտ ճանապարհից շեղված քաղաքական իշխանությանը դարձի բերելու համար: Եվ նպատակը դա է եղել, ոչ թե պետական կառույցները սաբոտաժի ենթարկելը, վնասարարությամբ զբաղվելը»:
Փաստաբանը, վկայակոչելով Սարի Թաղի դեպքերը, նշեց, որ այդ գործողությունները, սակայն, ոչ միայն չսթափեցրին իշխանություններին, այլև ընդհակառակը. «Նրանք կրկնեցին 2008 թվականի իրենց գործելաոճը»:
Հարցազրույցն ամբողջությամբ՝ տեսանյութում:
