ՀՀ Կրթության, գիտության, մշակույթի և սպորտի նախարարի տեղակալ Գևորգ Լոռեցյանը խոսել է մեր երկրում Ազգային մարզադաշտի կառուցման հստակ ծրագրերի մասին:
«Նախարարությունը պաշտոնապես ստացել է օտարերկրյա ներդրումային ծրագրի առաջարկ, որի համաձայն կծախսվի շուրջ 300 միլիոն դոլար: Առաջարկը արդեն իսկ փոխանցվել է համապատասխան պետական մարմիներին՝ հետագա ընթացք տալու համար:
Վերջերս ԱՄՆ-ում բանակցել եմ հնարավոր ներդրողի հետ: Բանակցություններն ընթացել են ավելի քան հաջող: Ամերիկյան ներդրողը՝ ներգրավելով ամերիկյան հեղինակավոր դիզայներական կազմակերպություններից մեկին, որը համաշխարհային առաջատարներից մեկն է ստադիոնների նախագծման հարցում, արդեն իսկ պաշտոնական առաջարկ է կազմել և ուղարկել ՀՀ Կրթության, գիտության, մշակույթի և սպորտի նախարարությանը», – ֆեսյբուքյան իրն էջում հայտնել է Լոռեցյանը:
300 միլիոն դոլար ներդրում կատարելու արդյունքում Հայաստանը կունենա ՈՒԵՖԱ-ի 4-րդ կարգի մարզադաշտ, որը կտեղավորի 35-40 հազար հանդիսական: Ազգային մարզադաշտը կհամապատասխանի միջազգային ամենաբարձր ստանդարտներին: Այս պահին քննարկումներ են ընթանում մարզադաշտի հնարավոր տեղի հետ կապված:
«Ցանկանում եմ միանգամից շեշտել, որ հավանական է մարզադաշտը կլինի Երևան համայնքի տարածքում, քանի որ ՈՒԵՖԱ-ի 4-րդ կարգի մարզադաշտ ունենալ Երևանից դուրս նշանակում է հնարավորություն չունենալ ընդունել միջազգային ամենաբարձր մակարդակի հանդիպումներ, ինչպիսին են Եվրոպական եզրափակիչները կամ Եվրոպայի առաջնության խաղերը: Այդ պարագայում մեզ անհրաժեշտ է լինելու ենթակառուցվածքների զարգացվածություն ստադիոնի հարակից տարածքներում, տրանսպորտային զարգացած ցանց, իսկ այս ամենը, ցավոք սրտի, Երևանից դուրս պատկերացնելն այսօր հնարավոր չէ»,-նշել է Լոռեցյանը: